早餐．午餐

今早行行下覺得有點肚餓，便打算早些吃個午餐，望望時間，原來只是十一點廿幾分，猛然想起茶餐廳還有早餐供應，於是食個早餐當午餐。

點餐冇耐後，見到一班人衝入來，一坐抵便立即各自叫早餐，侍應阿姐笑笑口問：今日幾多位呀？唔見幾個嘅？

這班似是維修公司員工，便立即指還有人趕來。

未幾真的有人跑入餐廳，大聲問未截早餐嗎？沙嗲牛麵腸仔炒蛋涷檸茶少甜……

看他們已熟架步，不用看menu也可以，也看得出他們跟我一樣，以早餐當午餐。

過年後，發現不少食店，把午餐由五十多，加到六七十個大洋，加幅是完全不合理，但早餐反而沒有加價，不用四十個大洋，而供應時間大部份都是去到十一點半，即使連鎖快餐店都一樣。

故此，見到不少人都提早食晏，晏些食早，少數怕長計，一日慳得一二十，一頭半個月，都五六百個大洋，一年便是數千大洋，所以之前說那些食店加幅驚人便是咁解。

自中小學開始不用再上早學，那便沒有爬起床食早餐習慣，到出來工作亦都如是，去食店食早餐次數，真係少之又少，數十年加埋可能未過十位數，但見那些醫學專家經常說，人，不能不吃早餐，否則……心想，那我豈不是要拿去解剖，看看為何到今天還可生存？

直至數年前，晨早起來去辦點事，公幹後又未到午飯時間，見一熟食中心竟然還有早餐？記得咸豐年代，早餐只是去到九點半，因為返學嘅返學，返工亦都返晒工，而家十一點幾仲有早餐？姑且叫來試試，到餐來了時，發現份量竟是如斯大的呢？

成日看電視劇，早餐都係得件包，或一著麵，印象中讀書時食個餐廳早餐，都係一小碟火腿絲通粉，一件牛油包，最多加隻煎蛋，食完都仲肚餓，所以試過叫兩個早餐食……

而家的早餐碗粉麵，是正常的大細，牛油包外，還可加兩款餸，甚至加幾個大洋添多款餸，自己現在會叫炒蛋火腿或餐肉，再結合為三一萬能俠，成為腿\餐蛋治，食埋碗粉麵加埋杯餐飲，真係飽，冇可能再食個午餐。

不止我是這樣食，洋人不少都是如此，因而創了個新名詞出來——Brunch，即是早午餐。

今日開心的是見到那女侍應，非但沒有那些傳言般黑口黑面，而是幫忙快手趕落單，更叫廚房等等，即使在連鎖快餐店中，都見過收銀員，大聲問有冇人要叫早餐，要就快點啦，尤其一些老人家顧客，常心大心細，這些快餐店是跟電腦程式，夠鐘便自動截單，欲點無從，所以一些員工便提醒顧客，雖然似是倒老闆米（早餐便宜過午餐），不過食客開心，自會回頭再幫襯，條數都一樣。