尋晚電視、電影、上網都冇東西好看，悶極無聊，開廸廸尼頻道，又係冇樣啱睇，撳撳下見到《The X Files》，以為係電影版，開嚟望望，原來係電視劇，仲係第一輯第一集……幾年前又係在網上第一次看這出名劇，看完已無記憶，但都不打算看，卻見畫面咁靚嘅？應該係修復過，於是乖乖放下搖控，一口氣看了三集。
早前與一眾飯聚時，席間千與千尋氏伉儷，向我喊了一句：「何伯」。
當時唔知咩事，只覺奇怪，心諗：「佢哋點知我煲完齣劇？」
之後冇再撘上咀，後來方知是指坊間那段東裝西𥄫飲湯事件，只看過這鬧劇的開頭，之後便冇再睇，因為但凡已估到答案的劇，便冇興趣看那些狗血劇情，睇過便算，唔會記上心，所以對千與千尋氏開的玩笑，一時俾唔到反應。
而真的是剛再煲完《執到寶》這劇，劉克宣正是叫做河伯，但不是姓何，是姓余名河，人人稱他為河伯。所以聽到千與千尋氏叫我做何伯，便想：「我似劉克宣咩？」
近日N記推出電影《城市獵人》，網絡間立時多了話題，都是集中講男女主角，大讚男主角鈴木亮平十分合適……因此都開了來看。
