真係奇怪，聽到呢啲騎呢音波功，未讀過書都唔會上釣啦，但點解仲係咁多水魚呢？
而昨天接了一個真正垃圾電話，越傾越扯火，收線後之後繼續執舊日的Blog文，執到近似的內容，先溫故才知新。
題目：垃圾電話
DATE: 04/30/2011 05:05:50 PM
早前有人投訴過一些機構出售個人資料給第三公司後，新聞界努力跟進，及後垃圾電話開始減少，終於可以過回一些寧靜的生活，但最近不知風聲是否不再緊，垃圾電話又開始發動攻勢，由早到晚不停打來。
通常一聽到：「先生你好。」便立即掛線，又或者是：「你是不是999機主？」則通常答「呢度係旺角警署，你搵邊位？」他們便會自動收線。
今日又收到一個垃圾電話，是一間從無瓜葛的銀行，那位小姐一開口便說她銀行有個償還咭數的貸款計劃，十分優惠，問我有冇欠咭數？我答有，小姐聽到後很高興似的，問我欠幾多咭數？
我便答她：「千零萬左右。」
她大驚及大嗌（真的是驚叫那種）：「點解你會爭咁多嘅？」跟住CUT我線。
垃圾電話已經算啦，仲咁冇家教CUT人線，又話幫人還咭數，騙子！
COMMENT:
AUTHOR: Ben
DATE: 05/03/2011 03:56:34 PM
有時都唔想玩佢哋，畢竟都是打份工啫，只是太過份才玩玩。
COMMENT:
AUTHOR: Ben
DATE: 05/03/2011 03:55:00 PM
咦，用日文答佢咪仲好？
COMMENT:
AUTHOR: Ben
DATE: 05/03/2011 03:41:30 PM
所以幾好脾氣都會忍唔住發火。
COMMENT:
AUTHOR: 嚴明
DATE: 05/01/2011 11:26:50 AM
不覺得有減少過，照例每日一兩個。
COMMENT:
AUTHOR: 姬絲汀
DATE: 05/01/2011 03:36:34 AM
收到呢o的電話，我通常用英文"哈囉"佢。有o的繼續"o畏"，我又再"哈囉"，咁佢就收線。有o的會聲震震問"canyou..speak..English..?" 哈哈，我答"no呀!"..收線!!最憎佢地專係食飯時間打o黎!
COMMENT:
AUTHOR: 周周
DATE: 04/30/2011 06:15:40 PM
叻仔，我都唔夠膽咁玩佢，通常睇到個號碼都唔聽收佢線，下次又試下咁玩先。
已是九年前的東西，十年都嚟緊頭，呢類垃圾電話仲係無法根治，不過今日傾的垃圾電話，不是關於錢銀。
前幾日部舊電腦又是無故自動斷電，去看看是否火牛有事，但這隻牛換了大半年左右，無理由咁快壞，見到機箱火牛有個紅色掣，手多撥一下，「噼」一聲，跟住一下火光──隻牛報銷，這方才醒起，數年前都試過如此整壞隻牛，經一事竟然不能長一智，真失敗。
因有工作要準備做，不想再跟部腦角力，跑去旺電砌部新機，之後重裝大部份軟件後，發現工具列不能加上大部份軟件捷徑，加了的又出現連結不到軟件情形，於是在windows的「意見反應中樞」內求助，傳了兩次問題，等了兩日都不見回覆，昨日再用「取得協助」這工具，即時通訊說出問題，但他們說是台灣站，要我留下電話號碼，等香港方面聯絡我。
未幾見到有個未接來電是上海打來，留了口訊是微軟公司要我回覆，打電話去後，轉接駁到去某位負責我的問題女士度，我第一句說的是：「妳可唔可以講大聲啲，我聽唔到妳講乜。」我已把電話校至最大聲，但都只係聽到正常的一半音量，到佢調校番正常音量，又發現佢講嘢慢三秒，加埋不是純正廣東話，已懷疑不是在香港。
本來都冇問題，但聽佢講啲方法，網上已有齊，仲不特止，佢係跟書直說，佢未講完我已跟指示做妥，問佢跟住點做，佢好似未搵到指示，加埋delay（應該是用whatsapp之類打電話來），我索性問係咪跟住點點點呀？最後無功而回，佢話會轉case去工程部，等工程師跟，叫我見到乜乜字頭的號碼不要block咗唔聽，我問，妳哋是在那裏？佢答：「上海。」
立時火都嚟埋，我話：「而家一日無數呢類字頭垃圾電話，我部電話會自動block，亦唔會因為你哋去解封，請你們工程師用電郵聯絡我好了，最後她給一個這問題專案號碼我，繼續話工程部會打俾我。
未幾又有一個未接的電話，留了口訊要我打回去，卻原來是接到我的case，要我講出案件號碼，等工程師得閒會打俾我，相信大家都想像到我已七孔生煙的模樣。
過了一陣，又有一個來自上海的來電，立時接聽，今次沒有了delay問題，而且對答爽快很多，但都聽得出那位仁兄的廣東話依樣帶口音，之後跟以前一樣，他們搖控檢查我部電腦，這方法好過用千言萬語，結果要重裝ISO，約大半小時後問題解決。
若果一早便這樣，便不用聽那幾個垃圾電話。
話說回來，為何香港的支援要搬到上海？
似乎外資真的對香港沒有了信心，又幾多人準備失業？應是幾多個家庭。
放眼望去，香港這大半年最活躍的商業活動就是：喂，你好，我係冥通銀行打嚟……
唉……
沒有留言:
張貼留言