離地旅遊節目

一早開電視看，正在重播一個旅遊節目。

看到那個男主持坐在一架南非豪華火車上，當火車停在某個站時，主持人探頭出車外，說看到當地貧富懸殊的問題。
當時覺得自己是未瞓醒，甚麼事都睇得、聽得很模糊，用手揉搓對眼，望清楚，佢真係坐緊架富貴列車喎，跟住再聽到他發表偉論，說要珍惜現在所擁有，再挖清耳垢，真係冇聽錯，但跟貧富懸殊有乜拏掕呢？要珍惜，不是眼前人咩？而家已變成眼前銀乎？

鏡頭好快轉到主持人要入住的酒店總統套房，見到佢好興奮的介紹豪宅般，在張巨床上碌來碌去，坐在電視機前兩尺的我，立時體會到他所說的貧富懸殊……
之後主持人介紹食生蠔，這都是我的「飛佛」，所以見他一路介紹時，都一路吞口水，但主持人又抛出一句：「咁大隻蠔，原來要養一年幾，就咁一啖食咗佢，太過份。（大意）」聽完後，內疚感油然而生，諗住搵個師父，幫啲俾我食咗嘅蠔，打番幾堂齋超渡，但跟住見佢大啖大啖的食落肚，立時覺得係自己未瞓醒，猛同自己講：「幻覺嚟啫，嚇我唔到嘅。」
只是，見佢跟住飲埋啲蠔水，話好有海水味，唔係太鹹。
分零鐘前，個主持說間餐廳養蠔的水，是在附近水族館取來，所以較清潔，那即是加了化學劑，不是天然海水，自己望望隔離雪隱個抽水馬桶，都有潔淨過的海水，係咪應該入去品嚐一口呢？
這一刻，不得不承認自己未瞓醒；好在只是看到節目的最後十零分鐘，否則，真係會覺得自己仲係從未讀過書，唔識分乜係歪理，乜嘢係真理。
近年已冇興趣看那些旅遊節目，因為見到啲幾廿歲麻甩佬又好，露肉養痴男青春少艾又好，上山下海都要揹住個背囊，睇佢哋行沙漠幾乎要仆沙，都唔俾除低個背囊，真係唔知佢哋為乜？跟住鏡頭無時無刻影住啲露肉養痴男青春少艾，一個鐘的旅遊節目，睇景大約得十分鐘左右，之後就係耳根受罪。
「嘩，好靚呀，嘩，好有口感呀，嘩，靚到想死呀，嘩……」用詞之博學，可媲美星宿大仙班門徒。
附送的甜品是靈堂孝子上身。
「好掛住屋企人呀，成九十幾年冇同佢哋食過飯，冇同過佢哋去街……」口水鼻涕是膽拖，每當睇到呢啲咁嘅畫面，第一時間，屬牛屬豬屬兔擰歪面。
Youtube都有不少自拍旅遊片，不過都是一大堆扐住神棍的動物界朋友居多，自我陶醉幻想係露肉養痴男青春少艾，廿幾寸芒，俾佢哋個頭霸咗十八寸，得番幾幾寸睇景。
都係懷念小時候電視播的旅遊紀錄片，睇情睇景，只有盧遠或者朱翁把解畫聲。
唉，都係唔適合睇現今呢啲離地旅遊節目。