蛋

早就說，不知大數據這個趨勢，是否已蔓延到日常生活中，總是對某些一開始注意時，便四方八面出現相關東西，就如你在youtube搜尋某類視頻後，每次登入便會自動彈出大量相近內容，又或在「孤告」搵過某類資料，便會在你視線下發放海量相近廣告（幸好在電腦上安裝了攔截廣告程式，所以半個也看不到）。
近日入侵生活的是：蛋

先是早幾日在附近小店買碗油渣麵，事頭婆幹活累到得坐下來，跟她打牙骹，事頭婆二話不說在盤中取出一隻熟蛋，一邊剝殼一邊話要補充體力，跟住同我講一日佢起碼食幾隻，我話妳唔驚咩？事頭婆話唔好信蛋有過多膽固醇嘅傳言。我就話係問佢唔驚食滯咩？事頭婆答話唔係一次過食咁多隻，覺得冇體力時先食。
之後行經街市，見到有大隻湖北蛋賣，雖然價錢略貴，都買了一些回家；突然心思思想煎太陽蛋，整碗極品餐蛋麵食。
如果出街吃東西，說要太陽蛋，絕大部份都是俾半熟煎蛋客人便算。（如下圖）

但真正太陽蛋是外邊微燶，中間七成熟，蛋白底金黃，入口先咬到脆邊，繼而蛋白軟綿但結實，蛋黃就看個人口味要幾熟，但通常都是有七八成熟。
煎太陽蛋一定要用中國的圓底鑊，可以兜住啲蛋白，所以煎出嚟厚身啲，油要多，基本上是半煎炸，所以蛋邊才會香脆，而且要慢慢煎，家庭火大約要三分幾鐘左右煎好，仲要一次只能煎一份蛋，食店的話，十個客點，便要分十個鑊煎，得一個鑊就要廿幾分鐘（食店爐火猛一點，時間快少少），呢個時間食店已炒好十幾碟菜，收幾百個大洋，如果用同樣時間煎十份蛋，收你幾多両銀好？所以出街冇乜可能食到真正太陽蛋。
小時候煎太陽蛋煎得最多，小學二三年級，因為讀下午校，有時家中得自己一個，午餐自己攪掂，擔張櫈仔企上去點著個火水爐，便煮煲煲仔飯（冇電飯煲），再煎隻蛋做餸，久而久之，煎蛋技巧已得心應手，半熟蛋放落個煲仔飯度，加兩三滴生抽王，流心蛋黃配熱香白飯，蛋脆飯焦香，食完便安心返學測驗捧蛋。
呢門自學絕技被娘親知道，以後但凡她要煮雞蛋酒，便會叫我去煎定幾隻蛋先，酒是娘親用來補身，蛋就是我們兄弟做餸。
不過人大了便食得健康，煎太陽蛋要用太多油，太油膩，所以都好耐冇煎，今番就因為買了最有蛋香的湖北蛋先再破戒一次。食完又忍唔住口，整多次，加埋豆豉鯪魚，變成豆豉鯪魚超人，呵呵，分享俾朋友睇得餐笑。

到今朝一早起身開電視，撳到去開電視，一睇，心諗：唔係嘛？
個節目係「健康原因講多D」（扶桑原名：駆け込みドクター!運命を変える健康診断），已經播了部份，今次主題係講蛋。
立時周圍望下，係咪真係有人監控住我？
現在部份電視台都買了這類扶桑健康節目，有時會覺得他們一些說法是誇大其詞，但出發點還是好的。
節目中他們說蛋跟長壽有關，訪問了幾位已長命百歳的老人家，個個行得走得，原來他們每日都食好多蛋，節目中講到蛋原來有一樣東西叫膽鹼，這東西是可以防止患上老痴呆症，而蛋亦是能補充肌肉的，節目中的老人家肌肉不比壯年時差，更說蛋有DHA，因為現在餵養雞的飼料，加入了魚粉，所以便有DHA在內，那豈不是魚蛋？

又實在的是，扶桑吃甚麼都喜歡加蛋，食碗拉麵都起碼有半隻蛋，常以為他們搵蛋塞飽客人個肚，就唔覺碗麵細，哈，原來是想客人長命百歳至真，想起事頭婆話一嗌攰就食蛋，這是不無道理的哩。

齋食蛋便長命百歳是無可能的，一定如節目中的老人家般加上不少蔬菜，但這刻開始食番多啲蛋又無妨，一來價錢不貴，二來蛋的食法變化無窮，食極唔厭。