疫情下停堂食

當朋友告訴我將會實施的食肆全日禁堂食呢個行動時，真有點愕然，心想疫情係有反彈，但未去到要行這地埗吧？不用問，又是那些所謂專家的建議，立時上網去找找消息（對不起，現已不是經常看新聞，所以要查回資料），果然又是那哼哈二將！話說回來，到今天，自己還是比較信任姓許的專家意見。

本來為了大家身體健康着想，減少聚在一起吃東西，也未嘗不是好事，因為有些人是總愛高談闊論，口沫橫飛，以現在疫情來說，減少到店子吃飯也是保健方法之一，但如那哼哈二將的講到世界末日咁，未免是過份杞人憂天，只會引發民怨。

再看看禁堂食以來，新聞總是帶出大家將會冇得食，等餓死啦這類唯恐天下不亂感覺。其實冇得去食店開飯，自己煮不成嗎？返工冇得出外午膳，自己帶飯又不成嗎？粵語長片都有得睇啦，人人自己帶個飯壺返工食晏。

定還是公司唔俾人吃東西？不會吧？大部份都有廚房俾員工用啦。在舊公司，不少同事都是自己帶飯，問佢哋唔嫌煩咩？通常的答案都是想食得健康啲，有些是自己煮，還有些是他們娘親為他們準備的（每每見到呢啲家庭飯都會口水流）。

那便明白某些人，一聽到冇得出街食飯便覺得比死難受；上星期開始禁晚市時，諗住走去買碗豬肺湯飲，點知事頭婆話冇煲，因為驚冇堂食賣唔晒，我立時笑駡佢，乜唔知而家係「無飯家庭」年代咩，啲人寧願幫襯妳買飯買湯都唔郁手煮啦，跟住附近班馬蘭奴食客扐起個碗，成口飯大聲附和我，看見呢班馬蘭奴，都會想像他們家中有終日戙高腳，手玩手機，咬薯片當開飯的賢妻良母。現在有娘親大聲嗌開飯，一家人搶着夾餸的情形，只能在博物館或靠電影電視，扮出嚟呃人先見到。所以一聽到話禁堂食，有乜辦法唔叫班孤兒仔聯想到三年零八個月，咬樹皮食人肉的境況。

老實講，真不喜歡在午晚飯時間在餐館進食，由其茶餐廳，為咗想做多啲生意，只會提供一早煮好的快餐，仲要你快啲食晒佢找數走人，佢哋可以翻枱，故此，平時都會揀些偏遠冇乜客的茶餐廳幫襯。

講回終日禁堂食要出街食晏，被傳媒講到是人間地獄，對不起，剛剛在YouTube睇Mr.Bean，佢午餐都係喺公園攪掂，我睇到呢段係笑到肚痛，真係唔覺有乜咁慘？

其實冇堂食係咪真係等同死人冧樓呢？上次獨自去扶桑，拜訪手塚治虫的常盤庄時，買了個麵包，坐在附近公園的長椅上如Mr.Bean午餐，未幾有個後生仔又係一樣舉動，先醒起，日劇經常有呢啲畫面出現，幾開心可以哈日一番，到今日竟然先知，露天食嘢原來係人間慘事，等同身處阿鼻地獄。

看到記者們憤憤不平的指，係咪要啲外判工人喺公廁開餐先安樂？我想同呢班無冕黃帝講，喺公廁開餐，二卅年前都有，可能你們腎有事，少去公眾雪隱，又或者是之前呢類故事唔夠火，你們冇理由去報道啫。在我樓下的幾條街五金店、車房、小販檔，一到午飯時，人人都係踎喺街，食飯盒的食飯盒，兩公婆開壺飯踎街，鹹魚白菜也好好味，我睇咗幾十年，所以可能睇到麻木晒，故此個人冷血成咁。

通街食飯習慣，並不是新鮮事，你睇呢張《奇謀妙計五福》劇照，以前看是喜劇，今天竟變成慘劇，哈。有位曾是電視台演員朋友，向我講番當年拍劇歷史，要通街瞓，踎街食飯盒，直到去荷里活拍戲才有改善，但講番當年佢又幾開心喎。

到底邊個倡議全日禁食肆堂食？姓何姓袁？邊個鬧全日禁食肆堂食？姓袁姓何？

這次的肺炎疫情，最厲害的是不停的的嚇死人新聞，肺炎是老人家的頭號殺手，老人家一旦被醫生斷症是肺炎，便等同被宣布步向死亡，所以當疫情開始時，自己先擔心那些老人家安危，心想有關人士應該先為他們準備，誰知一大班打壞，搶口罩搶到斷市，轉頭搵埋記者影佢哋去派口罩，真係前年個盤菜都嘔埋出嚟。

跟住啲哼哈二將又話要咁防又要咁防，又話乜意見物意見，總結一句，該死唔駛病咪夠囉。

咳，我都哼哈二將上身，病毒，我研究咗十幾廿年，從我國「本草綱目」book B中，已搵到一條良方，就是：大菌食細菌，細箘當補品。

上次沙士，到今次新冠肺炎，我發現呢啲所謂世紀病毒，係冇一個丐幫弟子「種蕉」，佢哋日日通街瞓，通街執嘢食，涼又唔沖，更唔好話不停洗手，照啲哼哈二將所講，應該所有丐幫弟子死光死淨。但點解只有坐五星級遊輪，去五星級酒店食自助餐的要入急症室，要隔離？

係洪七公降龍十八掌，打狗棍法勁？

我諗，而家啲人乜箘都殺晒，一般人身體啲箘可能十隻手指數得出，試問邊有兵去保護你個橋頭堡？