今午辦完事後，便走到長沙灣一間慣常去的雲南米線店，計落也有一段日子沒有幫襯。
看看時間，見未到學生放食晏，應該有位，入到去後發現已收起大半枱櫈，幸好都搵到位，店員來落單，二話不說點個例牌：「過橋米線，清湯。」
跟住拿起壺雲南普洱斟杯茶飲先，呢間店子就有呢度好處，普洱任飲，啱晒我呢個普洱茶痴。
「一啲辣都唔要？」店員問我，我立即示意不要。
「胡椒粉都唔要？」我表示唔食辣的，清湯可以了。
以前試過沒叫走辣，結果……
好快粉及餸到了，就等那碗湯；一陣後大碗熱湯到，先放生菜入湯，跟住拿起碗粉準備倒入去……
突然有一隻手截住我，並說：「倒碟餸入啲湯度先。」
那是一位上了年紀的婆婆，太耐冇去，唔知她是店員還是老闆？其實碟餸全是熟肉，只有配料香菜是生，總覺先後落都沒問題，但尊重老人家意思，便跟她做法。倒完入碗後，婆婆還是站在我隔離，以為她等收碟，誰知她問：「點解冇油嘅？」
自己左望右望，所有東西都齊啦？於是問：「係咪辣油？我唔食辣，所以冇要，唔該。」
「唔辣㗎，唔加唔好食㗎，加咗好味好多。」個個食辣的叫我食，都係講乜都唔辣啦。
任我再三表示唔食辣，婆婆都說要我試，耳仔軟，唯有說：「好啦，俾少少我吧。」
婆婆立時使出擒拿手，一手拿起我那大碗湯，直奔去門口的小廚房，見她舀了大羮紅油入碗粉度，我臉上一大滴汗已經隨地心吸力向下墮，那時幫我落單的女店員上前問做乜加油？佢話一啲辣都唔要呀……心想，已加咗啦，而家講有咩用？
婆婆把湯放在我面前，看見那一片有如紅海的紅油，第二滴汗已隨隊出發。
「係咪唔辣呀，好味好多哩？」自己立時話對對對。
跟住婆婆隔離站住一個男店員撘口話：「點會辣呢，加咗先好食嘛。」佢隔離站住的是落單的姐姐：「一早話唔辣啦，係佢話唔要之嘛。」再站喺佢身後有個好似係洗碗的阿姐又撘口：「唔加邊好食㗎。」下刪一百字……
臨走前老闆娘仲大大聲講：「記住下次唔好唔要，快啲再幫襯呀！」遵命。
原來我一路食，一路俾人圍觀，哈，真係有趣，所以回家後張呢個畫面畫幅塗鴉。
突然想起多年前寫過一篇類似經驗的BLOG……
我這樣過了一天
DATE: 08/04/2013 11:40:16 PM
前略……唔覺唔覺又時間飄走，腹中突然咕咕聲，方記起醒來至今（晚上8點），未吃過東西，於是一支公躂對人字拖落街找東西吃，腦海又再出現大豆芽，於是走去附近唯一一間有這小菜吃的餐廳，只是去過幾次，基本上都吃不到，只吃過一次咁大把，今次入內，醒目的先問有冇大豆芽呀？那女侍應即刻話有，心想：「咁好彩？」說時遲那時快，她正要落單時，另一個女侍應立即衝過來話唔好入住！然後拉住個女侍應到水吧，「細細聲」話：「問吓廚房有冇大豆芽先啦，佢次次嚟都冇得食㗎！」跟住佢哋「大大聲」問廚房，結果真係冇，跟住聽到佢哋竊竊私語，內容係話：「真係？佢次次嚟都冇得食？」「係呀，幾陰功。」「呢啲窮人菜係佢先食啫，平時邊有人食吖，我哋點會入咁多貨吖，叫佢點過其他啦，陰鬼功，介紹個啱佢身份菜啦。」（以上對白幾成真大家估啦。）這時一些食客都回頭向我打量。
最後我要了她們介紹的「苦瓜炆排骨」，唔知係咪大廚內疚呢？碟苦瓜成座山咁高，苦瓜食極都食唔完咁，最後堅持食晒佢，貫徹光盤行動，好耐冇食過四十幾大洋一個小菜連湯連飯會食飽人。
食完行過超市見到近來好飲的「好卡頓」啤平了一個大洋，十四個幾大洋一樽（細），買了半打回家歎，一路飲一路飲，不其然腦海浮番那故事出來，感覺好相似，而又好想如漫畫主角咁畫低一日過程加上注解，但即晚畫不到，到第二天（今日）才去畫下餐廳情形，恍惚又好似跟書的情節一樣，因為最後一版是因全書頁數編排有誤，結果是後來夾硬加上去，如跟故事的話都是第二天才補，哈，真的漫畫如人生？跟馬龍說起自己已全用電腦繪畫，他說電腦畫冇原稿值錢，我都認同，但漫畫自己一直是自娛為主，從冇想過值錢與否，不過跟他說，有時興起都拿起紙筆來畫，今次就是。
COMMENT:
AUTHOR: Ben
DATE: 08/06/2013 01:01:35 AM
好快七月十四，通街大豆芽任我食。哈
COMMENT:
AUTHOR: 米飯班主
DATE: 08/05/2013 04:07:25 PM
很充實的一天... 也很漫畫化的一天! 希望你下一次(於那家店子) 吃到大豆芽吧 !!! :D
話時話，近幾個月去過不同的初幫襯食肆，去得兩三次後，那些店員都會跟我撘訕，起初都以為係客套門面功夫，但他們可以記得我幾耐冇去過，真估唔到已經樣衰到呢個地埗，唉。
再望呢篇題目，是多年前一段漫畫的的名字，前年已畫好新版，放下了，最近又拿出來再大動工程修改，不知又改到何時？插圖則快手快腳攪掂，哈。
沒有留言:
張貼留言