靈異事件2021

近年都常在網上看些靈異片段（以前叫鬼故，而家改名為靈異事件，咁又真係比較合適些，無理由甚麼奇怪事都話鬧鬼的嘛），尤其在youtube上真係睇到你唔睇，不過睇得多後，發現十居其九都係「流流哋」。

首先那些片大部份係黑白，兼鬆郁懞，其次最多的如在辦公地方有枱椅自動行走，或一些紙張四飛，又或者有啲黑影走過之類，這些黑影除了話係鬼外，有啲仲話係外星人，真係任佢噏，而且呢類片都睇咗幾十年啦，所以漸漸都不去看了。

直至前年見到梁小龍於美國接受訪問，講述他遇鬼的經歷，嘩，內容精彩萬分，雖然是恐怖鬼故，但他演繹得風趣幽默又抵死，叫人睇完又睇。

自始又挑起找這類片段來看的癮，方始發現原來電視台竟還有這類節目，不過單望宣傳都已經覺得係喜劇多，來去只有一個電視台的間中會去重溫一下。可惜睇睇下又係流到得啖笑，啲所謂撞鬼經歷，最常聽到就係：我feel到有嘢囉、突然頭痛、個人好唔舒服……老實講，如果係咁，我一日起碼撞幾百次鬼啦！

再看其中一個男主持成日魂遊太虛，同啲嘉賓一樣，經常問非所答，最好笑一次，個嘉賓話自己見過牛頭馬面，又話俾鬼跟，要去搵個台灣天師解救，主持人問佢結果？佢竟然答天師話唔可以隨便同人講……咁妳上去節目做乜呢？跟住話有遊地獄經驗（都係見到呢個宣傳先坐定定睇），點知內容大約話佢模糊之間喺間房有架電梯，佢入去撳落去廿幾樓，跟住見到一啲奇怪場面，有好多得意嘢賣，佢想買時有位男士叫佢唔好攪，之後有個古裝人帶番佢坐電梯返歸……連個主持人都問佢係咪發夢？佢當然話唔係。

首先我已覺得事主講嘢時迷迷哋，可能係對住鏡頭緊張吧？但連地獄都去過，有乜咁緊張呢？第二，我想問問，遊地獄之前係咪睇完堺雅人齣《鎌倉物語》電影，還是看了我最喜歡一齣粵語長片，由胡楓、梁醒波、南紅主演嘅《生神仙》？都係有事主講嘅差不多場境，唉……

之後一兩集又有新嘉賓講有個個案，嘉賓說有一個男仔堅持冥婚故事，佢同一眾主持都異口同聲話唔應該，但話個男仔最後都係做了，一眾人搖頭嘆息，之後最精彩的，原來個嘉賓一早都是做了冥婚，當堂笑到想碌落地。

很多年前都寫過關於這話題的blog：

靈異事件

28th Jul 2010 | 談奇說怪 | (160 Reads)

人、鬼、神可以說是最奇妙的世界疑團，而所說的人，不是指人類，是指外星人，相信有科學常識的，都會相信地球以外，一定有其他外星生物存在，只是近數十年以來，說見過外星人的人不少，但真正的外星人則一個都未出現過，自己的見解總認為，作為訪客沒理要鬼鬼崇崇的，試問我們的太空人去到火星時，要神神秘秘的降落嗎（當年寫時都未去火星）？

神則是各宗教都會有的精神領袖，只是無數年以來，說見過神的人少之又少，至於鬼，通常都是跟神有關連，而在不同宗教都會有不同稱呼，但基本意義都相同，而鬼是三者中最多人話見過，亦是最多「人証物証」，不論是古籍小說、紀錄或照片，坊間流傳的故事無千無萬，自己則本是不太相信有鬼，但一些經歷又令這想法有所保留。自細細個時都有些經歷與鬼有關，有機會才寫下吧……下略

拖下拖下又成十年過去，好驚！而家都算係機會吧？咁就講其中兩件吧。

第一件是親身經歷，大約廿年前左右，那次是去扶桑，住在新宿一間business hotel。

住過這類酒店的朋友都知有幾大間房，那次房間的床，幾乎貼住窗台，只有一個身位空隙放行李。那日日間去了好多地方，所以回酒店時已很疲倦，很快便熟睡，半夜時，突然感覺到整個身體被拉扯到窗台，再彈回原位，由於力度幾猛，立時半醒起來，但還是合埋眼，心想：嘩，今晚地震得咁厲害嘅？

想完這句話後，便發現不妥，如果咁大震幅，冧樓都似，立時成個彈起來，望望四周，一切平靜，再望望杯水（由於扶桑天氣乾燥，習慣睡前斟杯水放枱頭，等空氣冇咁乾），成杯水冇wave，燈罩也不動，不似是有過地震，最後都是太疲倦，倒頭就再大覺瞓。（下圖便是當時的構想圖）

以上一件事雖是親身經歷，但不符合「人証物証」原則，咁再講一個有「人証物証」的鬼故吧，話說當年讀中一、二左右（唔太肯定），一天差不多放完小息，玩完一輪返課室等上堂，突然走廊傳來人聲鼎沸，由於就讀的母校很多天使（飛仔飛女），以為有人開大片，立時衝出去諗住霸個靚位剝花生，但見到好多人湧去一間班房，問人發生咩事，同學話阿乜水撞鬼呀！

敝校早着潮流尖啄，於咸豐年已實行「些牙」（share）文化，由於大家經常會因不同原因而漏帶東西上學，各班級每到轉堂時，自己及天使們便會遊走各級各班，相借墨盒、毛筆、課本之類緊急救援物資，所以很多天使同學們都會相互認識，這位撞鬼的同學，是自己的常客，因此第一時間衝入佢班房。入到去見到阿乜水（只係識佢個人，佢大寶號真係唔知係乜）面青口唇白呆呆的坐在位上，四周都圍滿晒各堂口天使，跑去佢跟前，問佢成件事係點，平時見佢人仔細細，卻凶猛有勁，但當日成個人頹到一副生意失敗樣。

佢話當落堂小息鐘響起，便走落下一層的男廁，見前面已有人衝入廁格，三格廁隨即關門，通常慣例是各自在廁格門口等入閘，阿乜水是等中間一格，但等呀等，左右兩格都不少人解手完，而他那一格依然無動靜，拍了幾次門催促都不果，由於不是大小息，所以好快上堂鐘便響起，他立時大怒：「喺入面痾鎖鍊咩！」大力拍門後，再一腳踢開度門，但發現入面根本冇人。

大家會話：阿乜水眼花啫。

但，同一時間係有幾個人見到有三個「人」同時入去各廁格，有兩個仲係左右伴住一個不明物體，而阿乜水形容過那個「人」，是略胖及高的身型，疏平頭裝，同樣是穿上校褸，只是沒有見到正面樣貌，如冇記錯，阿乜水提過似某班的一個同學，所以這就是「人證」。

如果用過公廁的都知，廁格鎖只能在裏面上鎖，外邊的不能上鎖或開鎖，阿乜水是一腳踢爛度門先入到內，之後我跑去那廁格觀看，見那門鎖真是遭踢爛而彎曲，即是話之前是在裏面上了鎖的，那便是「物證」。

這件事驚動訓導主任，他親自走來視察，見他左檢右查，一臉狐疑，當然沒有定論，最後那廁格圍封起來，貼上「修理」紙條，而阿乜水，如果冇記錯，他之後成個禮拜冇返過學。

所以到而家真的唔會太決斷的說：呢個世界冇鬼的。

說到底，鬼有乜好驚呢？人比鬼不是更可怕嗎？仲要日日見住不同的人……

自細細個時都有些經歷與鬼有關，有機會才寫下吧……哈