兩餸飯

近來那些「兩餸飯」開到成行成市，那間彌敦道店經電視台訪問過後，更成為焦點，每日晚飯時間人龍打蛇餅到十幾間舖咁長，因為不少人去買時發現某些餸賣完，寧願站在店內等餸出。

好奇走去看看，望見招牌總有種似曾相識感覺，後來在網上看到這店的老闆相片，方始醒起是早年跟同事行家，晚上收工後經常去銅鑼灣宵夜的一間同名酒樓，2019年時該區大部份食肆被迫結業，一些幫襯了十多廿年的老舖，相熟伙計都忍着淚說goodbye，這個老闆當年只需坐鎮酒樓，現在入廚開工，我們都說轉型都未嚐不是好事。

「兩餸飯」不是甚麼新鮮事，大家平時叫碟叉雞飯，已是兩餸飯，而以現在模式的，早在幾百年前，自己剛投身社會，在一間工廠打工時，放飯時間便有一架小型貨車來到工廠樓下，打開車尾門，便是快餐車模樣，他們每天都準備多樣菜色，如燜雞翼、豬扒、肉餅、豬皮蘿蔔……可揀一兩款餸。又試過返夜校前，詐詐諦諦混入附近的工業學校，在飯堂點這類「兩餸飯」。

後來這種兩餸飯近乎消失，無他，因為食得唔過癮。雖然話有兩三樣餸在盒飯內，但每樣只有少少，牛腩得兩三粒，雞翼得分屍後幾丁件，結果都係得汁撈飯，倒不如叫碟牛腩飯食，仲食得滿足。

過咗幾百年後，這些「兩餸飯」在部份大型超市開始再出現，可惜不成氣候，一個字講晒——難食，得個樣。直至差不多十年前，在油麻地戲院對面，開了一間「兩餸飯」，滿以為都好快執，但經常在午飯時間，人龍超勁，大部份都是附近中學的學生，當時諗：啲番書囝囡不是打電話叫老麥或薄餅食咩？點解會食呢啲中式飯嘅？又唔去茶餐廳幫襯呢？

走去望望，原來學生有特價，仲要是菜色花款極多，都是些家常菜，如蒸煎肉餅、蒸排骨㲜、蒸魚、燜雞、雞脾、咕嚕肉、炒菜之類，做囝時，娘親餐餐都係咁整，有時都食到怕，點解呢班未來社會碌杉好似前世未食過咁嘅？日日排成幾個字隊買，仲要扐住個飯盒行幾里路返書齋食呢？

有學生優惠係其中原因，我想，呢種家庭菜，呢班莘莘學子真係唔係成日有得食，叉雞飯呢類「兩餸飯」就成日食，菲、泰、印姐姐都係煮家鄉菜多，傳統中國家庭飯？難過有得食鮑翅，所以這點都應是主因。

由開始禁晚飯堂食後，一些供應給酒樓食肆的食物，都要搵出路，這類「兩餸飯」便可接手，所以便見到有龍蝦、蝦蟹、龍躉都出現其中，只是如到了解禁後，仲有幾多人會買這類「兩餸飯」？到時它們要跟酒樓食肆爭菜肉，勢必加價，相信起碼冇一半客，自然又出現一波結業潮。