請客菜

看了幾集《請客必食18道菜》，見到主持介紹的菜，都是鮑魚，海參，龍蝦，花膠，仲要係精雕細琢的烹調方式，唔好問好唔好食先，單係埋單，都唔知駛唔駛當埋條底環先夠找數？

試問佢哋想請咩客呢？請皇帝乎？

讀過歷史的都知，香港真係請過皇帝客，是為宋帝昺。

當年宋室同元軍打到近爆機時，宋室南下來到香江駐紮，到埗時去到錦田圍村，村民知道皇室駕到，點敢怠慢，立即大家籌旗，人人扐晒屋企至好的食物出來侍奉皇帝。

宋末年間，香港是私鹽竇，仲因為此問題，同朝廷開火，最後朝廷要派軍隊來港鎮壓，再派兵駐守，先壓制到班鹽梟，所以那時香港雖然係所謂小小漁村，實質人人有錢，加上係漁村，估計當年呈上來給皇帝食的，手釣海鮮魚蝦蟹起碼幾擔，劏雞殺鴨宰豬更係例牌，加埋啲即摘時蔬，咁多樣餸邊夠碟上？唯有攞太叔公個洗腳盆嚟裝，那便成為名留後世——盆菜。

其實當年阿昺，得嗰九歳人仔，仲要走難嚟香港，做第一代新移民，嚟到就入難民營，會食過幾多好嘢吖，見到咁大盤食物，真係眼都發光，梗話好食啦。

黃帝金口一開，盆菜便列入米之蓮，人人都即刻話好食，必做請客菜。

但阿昺食完盆菜冇耐，就俾人揹咗去跳海殉國，都幾大吉利是，難為而家過時過節，家家戶戶都話要食盆菜……

節目中，黎耀祥不時都提及兒時去飲宴的菜式，都幾有共鳴，說實在，三四歳人仔已經常食酒樓宴會菜式，事關屋企人是在大酒樓做，咸豐年代，差不多晚晚都會有人在酒樓擺酒，如婚嫁、壽宴、出國讀書、學成歸來、公司周年等，都會擺番幾圍，而每有剩菜，家人便會打包回來第二日加餸，不要以為是菜頭餸尾，很多時是整碟菜拿回來。

因為那時的菜很大碟，去到一半食完翅，賓客便嗌飽，甚或開始聯歡活動，唔得閒食，所以有時是一整隻炸子雞，大半隻燒鴨，印象中有種炸到紅色的魚塊，味道不似鮮魚，肉身好乾及嚡，但好大件，我就覺得好食，屋企人就唔多食，後來長大後去的飲宴中，已不見了這味菜，翻查資料，估係煙燻大鷹䱽，今日如果要食回當年咁大條鷹䱽，真係要天價……

另一樣黎耀祥常提到的飲宴菜——鮑魚，他說是用罐頭，但那些年我食到的應是乾鮑。

幾歳人仔時，娘親欽點可以跟她去飲（但不能走漏風聲給兄弟知），早一星期，已見娘親去裇髮，搵定隻金錶金戒指出嚟，更罕有地帶小弟去附近攤檔買條新褲，當時問娘親：「我條褲穿咗八個窿咋，上年穿十二個先買新褲，妳係咪數漏呀？」

娘親答話：「死仔，而家去飲，着條穿窿褲去，係咪想失禮主人家吖，咁大個人讀屎片咁，一啲家教常識都冇，飲完返嚟就收埋佢，等穿十三個窿時先換。」

今時今日，如果娘親見到那些潮人衣著，當年一定唔會買新褲俾我……

去到飲宴時，發現最搶手的是魚翅，見啲大人三扒兩撥食完，再放個碗出去，等樓面（較侍應高級，那些年，要這個級數先可把菜捧到客人桌面及收碟）回來替客人添食，但有一味菜，只有一半人食，就是冬菇鵝掌燜鮑片，食剩一半的都是鮑片，每片都有成年人手掌大小，我問娘親點解唔食嘅，佢話咬唔爛，梗胃，但見我好想食，就夾一片俾我咬，一食，嘩，咁好味嘅？想食多片，娘親卻唔俾，話唔消化，照當日目測，應該該係一頭窩麻鮑……而且記得那鮑片是深啡色，而且真係要咬好耐（人仔細）。

而那年代，屋企人拿回來的宴會剩菜，是從沒有鮑魚的，所以都想像到，鮑魚其實不是太受歡迎，連下欄都唔吼，印象中，娘親只會買些乾鮑仔煲湯，湯渣係唔食，只有cheap如我，才會執埋嚟食。早前在網上看到一張遠年食店menu（估計是六十年代），看到鮑魚燜雞飯，也不過與一般碟頭飯價錢一樣。

直到八十年代初，鮑魚都不是太值錢，八一年的《摩登保鏢》中，其中一場戲，許氏三兄弟去木屋區探人，主人想整冬瓜盅，竟然用上兩三頭乾鮑，木屋區喎？住的都是草根階層，那便可見一斑。

若干年後出來社會工作後，有一天想煮碗麵食，見雪櫃冇餸，就落街諗住買罐午餐肉，行到間辦館，見到櫥櫃有幾罐車輪鮑，標價六十個大洋（記得好似係，那時午餐肉都係幾個大洋一罐），摸摸褲袋見剛出了糧及稿費，有閒錢，不如就買罐煮麵，返去一開，發現搵老襯，成罐得一隻手板咁大嘅鮑魚，仲係白𠽌𠽌，唔似以前去飲嘅深啡色，心諗係咪鮑魚嚟㗎？覺得俾人呃，但開咗冇計，唯有一啖麵咬一啖鮑魚，但咬落幾淋，又好重鮑魚味……故此好肯定兒時在酒樓吃到的鮑片不是用罐頭貨。

到今天望見富貴人家們，說要用刀叉去食一哥鮑魚，咁樣請客先有派頭，講真，有點想笑。

其實請客，預備好的食物是緊要，但心意方為重點，近年看得窩心的是，中國為訪客美國前國務卿基辛格（Henry Kissinger）設的午宴，那是專為格老100歳而準備的驚喜，相信格老事前都不知情，中美近年關係緊張，格老是次去中國所受到的款待，比其國的CEO得到的仲要高，原因是，中國一向視格老為老朋友，正所謂對事不對人，這份心意，不是因為用了幾多錢，而是如此時勢，人家還是惦記老朋友的那份心意。