經常在網上的社交群組中，看到不少網民張貼些竉物或動物照片及片段，絕大部份都是貓狗為題，早年是傾向小狗多一些，近兩三年則被貓咪趕上了。
平時行街或旅行，見到小動物或昆虫都會拍下照片，發現都是影貓的多，這是不難理解的，因為貓是極有個性，不會被管束，自出自入，狗則會安份的在原位，甚少外出，所以平時見貓多過見狗。
今天養貓狗，都是當養囝囡方式照顧，萬千竉愛在一身，行街見到牠們，都會紆尊貴踎低同佢哋打番張卡。
做囝時，住在唐樓，樓上樓下不是養狗就是養貓……
養狗的就用來看門口，那年代小偷入屋，道友踎在樓梯角落追龍等，是經常出現，而這些唐樓除了正門外，還有後欄（後門）可以出入，不少住戶都愛走出後欄曬衫，或八卦聯誼一番，當時頂樓住了一戶經營洗衣生意，他們後欄鐵閘常開，方便上天棚曬晾，故此他們便養了一頭大狼狗，就是要牠做看更，樓下的住戶養較細隻，記得似是北京狗及吱哇嘩，再下一層樓的則有隻明星狗——拉茜（牧羊狗），那時該齣外語劇大熱，但凡見到牧羊狗都叫拉茜，每逢牠一出現，我們成班細路便捉住佢摸唔停手，學電視嗌番句：拉茜！
所以有咁多看更，整幢唐樓都好少罪案發生，有都係啲家賊所為……
養貓的只有一個目的，就是捉老鼠，除了家養之外，不少店舖都會養隻貓，直到今天都是如此。
包租婆就養了一隻高竇貓，呢隻貓唔理人，自己巡來巡去，得閒去廁所，廚房或神枱痾一篤，之後便出街shopping，到時到候就返歸開餐，但佢好盡責，久不久就交功課，放低一兩隻老鼠，所以成屋人都好敬佩呢個衛生幫。
後來唔見咗佢幾日，包租婆打鑼都唔見佢，以為佢跳槽去第二間公司，直至過了一排，有一日，娘親同包租婆捉住我，去其中一間房門口跪低，心諗大劑，梗係偷娘親錢東窗事發，今次一定又行笞刑……卻原來該房房客上班鎖了門，但她們聽到房內傳出貓咪哀唬聲，所以叫我跪低從門檻罅裝入去，睇下係咪衛生幫返咗嚟，結果一裝之下，大叫了一聲：好多血呀！
跟住便見到幾隻小貓在衛生幫身邊，原來衛生幫出咗去老蘭wet，仲俾人攪大個肚，到臨盆先返嚟老家，又唔敢去包租婆間房生，驚俾包租婆鬧吧。
最後要等房客收工回來，才開房門善後，印象中包租婆分送晒啲小貓去其他朋友處，一隻不留。
那個年代就是如此，很多家養的竉物都不用錢買，不是友人贈送，便是通街執，有些是自來的，走上門唔走，而一般人都認為自來狗是會帶來運氣，所以都肯收養，貓則相反。
而當年的狗名好統一，中文叫旺財，番名叫lucky，中英混合就是dolly（多利），喺街叫聲旺財百幾隻狗會衝去你度，情形等如喺彌敦道叫聲陳偉強，百幾人會擰轉頭問咩事一樣？
貓都係，印象中全部都係叫花花，小學課本都成日讀小花貓，可能都係呢個原因。
而那時這些保安及衛生幫都係粗養，狗就俾啲冷飯湯渣就得，貓嘅飯就煩啲，要去街市買啲叫貓魚，煎香佢再加冷飯，咁啲貓先肯食，至於甚麼打針之類，咪玩啦，生滋就剃光啲毛，再買藍藥水搽，一陣就好，絕育手術？哈，落街搵閹貓陳，兩嘢攪掂。
而一般人對待貓狗更是粗粗魯魯的，阻路便一腳踢開，因此有老話，就是：慘過做狗，又或者：好狗唔攔路。
而家風水輪流轉咯，人就折墮得多，食個飯盒就一餐，旺財同花花呢？食得唔好，鬧佢兩句，就會俾人告虐畜，報東張，擺上網公審，要殺頭㗎……
幾年前看國內的竉物網文，為現在的竉物奴，冠了一個新職銜——剷屎官。
真係又抵死貼切又啜核。
沒有留言:
張貼留言