請別亂認車仔麵

早前看到電視上的一個介紹食店的節目，當女主持說那是車仔麵店，但有不同湯底揀，又有不同高價食材……

立時真係上火，那是甚麼車仔麵店？根本只是一間麵店，關車仔何事？不是有得揀餸就係車仔麵，雲吞麵店都可以揀食雲吞、水餃、牛腩、豬手，或是拼在一起，但人家從不會稱作車仔麵。

上圖是在網上偷來的，應是上世紀六七十年代，旺角奶露臣街域多利戲院（現是旺角電腦中心），那妙齡少女擺賣的車仔，正是當年流動小販的生財工具，不知她是否在賣麵？但應該都是，少女扶着的位置是放麵，分別是幼、粗、油麵，及米、河粉，那個筲箕是用來盛菜，車上分開數格，大格是用來煮麵，另一格是湯，放在前排的數格，便是車仔麵的soul mate：豬皮、魚蛋、蘿蔔、豬紅、魷魚、豬腸、牛腩碎等平民菜……還有豉油、甜、辣醬供客人自行調味。

一架車仔就係咁大，邊可能有幾款湯給客人選擇，那些湯，我們稱之為豉油湯，煮好麵後，小販會加少少牛腩湯汁，要辣的便加咖哩魚蛋汁落去，基本上只係令碗湯麵有味而已，冇乜客會飲湯，通常飲的，是俗稱單身寡仔的單身漢，平日冇湯水潤，所以豉油湯都飲過清光。

另外，食車仔麵都是立食為主，拿住碗麵圍住架車仔食，冇位就走入路邊立食、踎食，碗麵熱過頭，就放在路邊的私家車頭……那奶露臣街更方便，不少人拿去後面球場內食，貪可以坐，或一路食一路看人家踢波，食完回來，如遇上走鬼，不見了個車仔檔，只要把碗筷放在路邊，車仔檔走完鬼會回來收。

而去車仔麵檔並不是只食粉麵，有人會只是點車仔麵的soul mate，見他們會加一大劈辣椒、甜醬及咖哩汁，然後食得津津有味。

其實當年車仔麵還有一道殺手鐧，是現在冇人用，那便是會每碗加上少少熟油，雲吞麵店正常都會如此，但車仔麵加的是豬油，當然是因為價錢問題，加了豬油後，真係有種特別風味，現在怎會有人如此做，所以真的食不到當年味道，以前都試過在家中煮麵後加這種熟油，只是出來的味道，始終冇車仔麵檔的好味。

現在都會去食車仔麵，當然只能入舖食，亦只會去食真正的車仔麵，今時今日他們入了舖，但仍舊維持一格格放餸的設計，當然是多了餸菜選擇，顧客可以裝得一碗都是滿滿的，但不變的都是豉油湯底，冇得揀。

自己由細到大都是每次點一個粗加一個幼麵，食足百幾年都是如此，近幾年常去大角咀一間食，依然如此食法，有次滯滯地，只要了一個幼麵，事頭即刻俾說話我聽：一個夠啦咩？

明顯呢個怪異食法，唔係咁多客如此，所咁記得我呢個客仔。

車仔麵自覺是香港文化遺產，自從被衞道之士趕盡殺絕後，幸好仍有後續堅持，但請清楚界定何謂車仔麵，不想這傳統被那些潮人扭曲。