飲啖茶

看了幾集羅家英主持講飲茶的節目，當中介紹到點心的資料，有些是與自己所知的不同。

例如燒賣，一向認知是因為點心師父，在深宵半夜整好後拿出來，客人去買，故而得名，但原來是由元朝「稍麥」演變發音而來，只是到今天，燒賣實質發音是燒買，不是賣，即使看到扶桑做的，都跟廣東發音叫作「燒買」，與「稍麥」音，差天共地，所以都係當為其中一個典故來聽吧。

而看到他們拿出一籠燒賣來介紹時，真係……仲有冇再寒酸相呀？

成籠燒賣縮水到嚇死人，以往一籠燒賣，起碼都有大半籠大，有鏡頭影住，識做都整籠大燒賣出嚟嘛，去街邊篤串魚肉燒賣都大粒過佢。

跟住介紹其他燒賣，有些真係幾好笑，例如流心鵪鶉蛋燒賣，同埋豬膶燒賣。

呢兩款燒賣，小時候是在茶樓常見的，後來停賣了一段好長時間，不是他們說的甚麼做法有難度，而是冇人敢食，鵪鶉蛋燒賣（冇人會做流心的）的蛋，被指是極高膽固醇，嚇死班三高狀元，今日仲叫他們食流心？

豬膶有段時期被指對人體有害，好像是說有重金屬，又係對三高狀元不利，那時，別講豬膶燒賣冇人食，連打邊爐啲黃沙豬膶、枸杞滾豬膶湯、炒、蒸豬膶都冇人起筷，直至近年先幫豬膶翻案，豬膶燒賣才回歸點心界。

有集說到大包典故，則是擦新知，一向都只知大包是益街坊咁解，小時候跟大人去飲茶時，一有雞球大包（另一種是四寶大包）推出來，茶客定必一窩蜂去搶，因為一個包，夠一家大細去分，搶不到雞球大包，便可以等mini版——雞包仔，同樣好多人爭要，或許那些年，雞始終比較貴。

在昔日社會，飲茶是高消費家庭項目，每當假日，一般家庭便會齊人去飲茶，而那些年，香港都是大家庭為主，閒閒地七八個大人細路上茶樓，足夠坐滿一枱，只是一般家庭都收入有限，而一籠點心，最多是四粒蝦餃，俾得大B食，B女又話要，孻仔伸手又想搶，嫲嫲阿爺又流緊口水，叫多籠？唔好玩啦。

所以茶樓便會推出一些實惠點心出來救急，大包便是其中一款，之後便可算到糯米雞、皮蛋瘦肉粥、叉燒包及盅頭飯，都是便宜、飽肚及可以分開大家食。

今天，大家庭少了，收入又多了，一籠唔夠食？叫十籠囉，千祈唔好餓親個乘仔。

所以大包消失了……咁大個包點食呀？唔健康呀，三高呀！想食肥人麽？……糯米雞？咪即係午茶珍珠雞，珍珠雞咪即係早茶糯米雞……

當年如果飲茶要食點心食飽，埋單唔係講笑，所以通常一坐低就整籠叉燒包質飽班細路，或者朋友，到食了第一輪點心之後，大人們會立刻叫碟炒粉麵大家食，咁先化算。

飲茶除了要計住點心錢外，還要計茶錢，正常是按人頭計算，若果十個大洋一位，十人便是一百個大洋，唔係講笑，故此以前飲茶都會叫伙計計少一兩個茶錢，相熟伙計都識做的。

點解要收茶錢呢？

因為其實是分開茶樓及酒樓，酒樓是故名思意是飲酒的，請客食飯，擺酒宴會便是到酒樓，他們的茶絕不講究，據聞是開定茶膽，客人都是同飲一款茶。

茶樓則是有齊靚茶葉，客人可以指名要那種茶葉。

一般上茶樓的，叫做嘆茶，正所謂一盅（茶）兩件（點心），故此便會收取茶錢。

看倌都知法國人喜歡慢食，一餐飯，可以食兩三粒鐘，其實中國一早已是如此，上茶樓嘆茶的，左扐住籠雀，右拿兩三份日報，坐低飲茶可以食三四粒鐘，比起法蘭西人更懂慢食。

以前都聽大人說，會為有靚茶飲，而常去同一茶樓，所以茶樓收茶錢是所有茶客都接受，只是一家大細去的話，難免牙痛咁聲。

現在飲茶，茶壺冇晒水，大家便會打開壺蓋等伙計加水，這個習慣來源，相信不少人都清楚，但當年是那些壞人做衰規矩呢？

據已故李我先生回憶錄所記，是一群漢奸所為，那群漢奸便是旗下（吓音）人，這班旗下人實為漢人，他們祖先是滿州人奴隸，到他們那一代，不認自己是漢人，認滿州人作父，四處生事，可以看看洪金寶的《三德和尚與舂米六》，便知何是旗下人。

現在已不再分茶樓或酒樓，都是可飲到不同的茶，及食到點心，只是茶客真的是少了，無他，消費貴，點心已不便宜，又茶錢又加一，所以很多人都選飲下午茶，因為點心粉麵會減價。

飲開早茶的，會忍到下午兩點半等下午茶，數年前，相約一位朋友飲茶，去到酒樓已爆滿，伙計安排我們撘枱，一張十二人枱，加埋我們兩人，剛好坐滿，只是一坐下，發現所有人默不作聲，人人木口木面，酒樓燈光又暗，立時望下枱底，看看他們有冇腳？

未幾，伙計拿住多壺茶來派，原來大部份都是一兩個人來飲下午茶，這奇景嚇我一跳，朋友駡我大鄉里，少見多怪，他自己早已見怪不怪，也是常一個人去飲下午茶，因為便宜得多。

其實酒樓茶樓何必要企硬價錢呢？既然下午茶有得做，收少些，做多些客，不好嗎？

看，現在不少以餐廳模式的點心店，都是門外排滿隊，証明一盅兩件是有大量客，只是食客不願付上那麼多額外費用，那真的不值得改？一天到晚打住旗號話創新，做些古靈精怪打卡點心，實際不過又是扭盡六壬做縮水腸粉，瘦身燒賣，侏儒糯米雞，試問點樣可以留客呢？……其實知不知很多人上茶樓，是想食回現在常講的懷舊點心？外國遊客不少都是專程來香港，是為飲壺茶食點心，不過是昔日的茶樓風味……拿回一些真正飲茶情懷出來還好吧。

自己去飲茶，習慣一坐低便叫滿一枱點心，因為個人認為點心食不飽人，只是幼時屋企人要睇點心錢食飯，先冇得叫咁多……近年契妹花旗大姑回來省城，搵我品茗時，每次見到成枱點心，大姑都叫救命，冇計，花旗國邊有咁豐富中國自助餐？梗係唔好餓親個妹，要大姑食飽先返歸。