新冠肺炎疫情下，大部份人都加入無菌教做信徒，一眾信徒見面，都會雙手合什先諗句經：死開啲，唔好行咁埋。
呢排睇咗幾集ViuTV 番文台的《清潔狂大作戰 2》，最初以為是那個乜乜廚神哥頓拆人餐廳的肥皂節目。
先題外話，前幾年深宵無意就看了這節目，佢話去救人家的餐廳，一去到就F來F去，鬧呢樣鬧嗰樣，又要扮嘔到要入ICU咁款，跟住鬧店主話咁樣梗係冇生意啦，但望見餐廳坐了一大半客，冇人投訴，小小一間餐廳員工有成十人左右，這叫生存不到？之後要人成間拆晒，跟佢意思裝修，這是一間應有數十年歷史的餐廳喎？事頭婆一路俾佢鬧一路喊咁口認錯，但又俾佢做，我諗係電視台俾錢裝修，所以事頭婆面就喊，心就笑，之後連個資深大廚都要跟佢指示做餐，那，同老麥，家鄉雞有乜分別？結尾一大班客坐滿餐廳，這自然是班路人甲，最後頂唔順呢啲美帝霸權主義，一集也不再看，但凡見到呢位F俠哥頓的電視節目，都會屬牛屬豬擰歪面。
拉回話題，《清潔狂大作戰 2》是英國節目，看一些預告時，以為用類似F俠哥頓手法拍攝，所以開頭都無專心的看，再看下，節目是用三段關於清潔情節交錯拼出來，兩段是兩個人分別到到兩個不同的家居大清潔，另一段是幾個有嚴重潔癖的人，四出去檢測不同地方的含菌量，從而開解他們過份的潔癖病態，所以節目算是幾平衡。
其實很多人都是把「擁有」與「收藏」混淆；不停買，買完丟在一旁，那是擁有，珍而重之，閒時拿出來觀賞及整理的才是收藏。
現今大部份人活在物質豐盛世界，不停買心頭好，還未及拆封，又有另一心頭好想買，因此物件越堆越多，樣樣都話唔捨得掉，樣樣都話有紀念價值，樣樣都話將來可能有用……
想起大契妹早幾年說要把夫家大清洗，因契妹夫又是囤積了多年雜物（慘，又爆佢啲秘聞，佢返嚟一定俾佢打死），決定來個斷捨離，其實這與《清 2》個案有相類似的地方，就是在外國，一般的住宅都是較大，這自然便會不自覺囤積雜物。
節目中另一囤積雜物家庭，其問題就是那身為女主人不肯打掃，看其身形噸位，已心中有數，實際上那些不肯打掃的人都是差不多身材。女主人唔郁，連男主人都唔郁，說不敢動物件，怕老婆不開心，到幫手執拾的女士要他郁手，他竟拿着收來的衫褲問人應放在那裏？氣得那女士七孔生煙。望望這家庭一家四口，每間房的雜物都是堆得叫人寸步難行，歸其原因，一個「懶」字，大人有成千上萬藉口唔郁，兩個小孩雖然年紀小，但，已有樣學樣。
自己發現，執拾與不執拾的，大多是家族DNA遺傳，自己家族是比較整齊的，各人自少到大都是把自己的東西妥善擺放，自己甚至不會囤積太多東西，例如，小時候常買下不少漫畫，擺放一段日子後，留下少量較珍貴的（儲到現在），其餘便拿到附近舊書攤賣掉，到大了，每約過三四年便來一次大清洗，一些幾年無再看的書，玩具，舊稿，合埋眼便處理。通常望着這些雜物，便問自己：已擺了十年未動過，再擺都係廿年都不會看或用，等同一堆廢物。
前一兩年去一個女畫家畫室，替其作品拍照出書，見到她的書多到放滿書櫃外，還要堆積到地上，她們畫會數十年來不少人出版畫冊，相互贈閱，又或在各地購入名家畫冊等，所以便積存那麼多，她說其囡兒擔心她年紀大，不時搬動那麼多書會弄傷身體，所以用木板加碌做了架板車，放上了書便可以推去作畫地方，但我見那板車上已擺了近六七十本書，所以我問女畫家，最底那本書她幾多年沒拿出來看？她答話其他書咁重砸住，冇扐出來都近十年。之後我說估計再過十年那本書都只是原封不動，那同掉了它有甚麼分別？起碼妳不會因它而受傷。
今天新冠疫情，人人擔心病毒，但不少病毒就是滋生在囤積的雜物內，為何又不驚？
人就是這樣，一去到自身利益，乜都假，自己話乜就乜，理得咁多。
所以條街通地用過嘅口罩，堆填區積滿即棄口罩、食完嘅飯盒。
甚麼環保少用紙，要少用百幾萬年先分解發泡膠盒，要走塑……兩三個月就做了十幾廿年破壞地球的舉動，冇辦法啦，人命最緊要，地球？冇事先諗佢啦，話之佢將來劏魚時見到一肚口罩吖。禽流感就殺雞啫，肺炎唔通殺人咩？人命係命嚟㗎。有事就要學嗰兩個譚蘭卿，梁醒波咁，話係人累佢，自己屋企死幾多人都係人哋累佢，總之一定學足丑生王做手。
呵呵……人啊人。
咦，好似把話題叉到冇雷公咁遠，唉，睇得丑生多係咁，其實唔應該用兩位大佬倌來形容嗰兩團脂肪，有辱梨園瑰寶，罪過。
拉回《清潔狂大作戰 2》，其實估計做完show後，那些屋主都會故態復萌，畢竟相信愛不愛整潔，遺傳因子是主因，是懶，是潔癖，一世都不會改變。想起quino有幀漫畫是最好的諷刺。（不好意思偷大師圖）
既然講到新冠肺炎，又講多兩句，有說日本漫畫家大友克洋，在數十年前所畫的鉅著「阿基拉」中，神測到2020東京奧運會取消，的確幾匪夷所思，但昨日在網上找《清 2》的圖片時，無意中見到東奧的logo（通常在搜尋時都會彈出無關照片，總覺得電腦係唔識字），即刻嘩一聲，原來扶桑申奧成功後，就已預測到咩原因2020開唔到奧運。下圖是自己併合出來的，信唔信邪？
沒有留言:
張貼留言