超自然實錄談

最近深宵睇完齣N年前《九五至尊》之後，又播番啲近作，雖然未睇過，但冇興趣睇；都唔明以前咁多輕鬆劇，做乜唔喺呢段沉悶日子播嚟俾人解吓悶。冇電視節目好看，扐個搖控漫遊，看到明珠台間中播一齣《超自然實錄》好似已播了幾集（無心追看，撳到播就睇），先看的一集時，見到不少內容是這幾年來，在YouTube已睇過，例如一個年青網紅在做直播時，他身後的門自動打開再關門，又見到話有人影到天上有隻史前翼龍在飛等。

節目中搵咗幾個唔知乜水的二打六，講幾句無厘頭對白探討啲片斷，既不是分析，又不是舉例駁斥，只是像幾個三姑六婆喺度話，啲菜好貴，第二個話真係好貴，第三個再答的確好貴。

啱啱睇呢集，簡直係喜劇，有個洋鬼子雷宇揚，去墳場搵鬼，不停有鬼聲答佢，好笑在隔離做收音之類動作的女仔，成嚿木頭咁，全無反應，唉，星爺成日都話，臨時演員都係演員，硬係唔聽。

另一段，有個office鬧鬼，啲人收工後，cctv影到一張辦公椅自行來回滑走，電腦芒齊開齊關，文件周圍飛，睇到呢度，真係想大笑出來，不過三更半夜，怕人家以為係鬼笑，所以忍住。大佬呀，卅年前電影《人鬼情未了》（Ghost）結局咪拍過呢場囉，不如話Patrick Wayne Swayze（於2009年逝世）陰魂不散，重返陽間再演一次，咪仲有話題。

再之後一段，說有個人搬入新居，經常聽到閣樓半夜傳來聲響，於是又用cctv拍低，見到真係天花自動拍打，以為跟住有得睇捉鬼，點知答案係佢即刻搬走，又係想笑出來，點解唔行上去搵嚿石砸住個天花，咪乜鬼聲都冇囉。

其餘的鬧鬼，疑似UFO，又或是海怪等，都係冇答案，因為呢啲片係由觀眾投稿，冇理由仲要人搵埋專家嚟踢爆吧。

其實這類所謂超自然事件，一直都有，但又一直都冇。

好多人話見過UFO，但UFO又好似鬼或神，從來不現身於人前，咁係有定冇？而家人人進化到有部手電焊實喺手度，見到神鬼UFO都好易拍低吧？但係睇得最多仲係，夜媽媽拍咗幾個鐘嘅縮時銀河、星軌片，片入面搵隻UFO，或者南天門班天兵天將交更畫面都冇。

細個時候都有驚鬼的諗法，但出到社會後，發現人比鬼可怕無千無萬倍，鬼夜哭唔可怕，謠言先是最可怕，細個怕鬼會鍊死人，大個後發現人係會笑住對你，卻背後插你幾刀，死咗都唔知咩事，諗起就心寒。

所以當唔怕呢啲鬼怪後，遇上一些超自然事件後，總是第一時間靜下來，想想到底是甚麼一回事，每每發現都是小事一樁，或是「老友」探訪，幫忙做點事而已，沒甚大不了。