湯

 昨日見好天，便跑去尖沙咀希望睇到靚日落，最後皇天不負有心人，欣賞到壯麗的夕陽西下美景，月出時，太陽還未完全下山，形成真正的日月爭輝景象，在場的不少拍友，或坐或企的都對這一刻景致拍過不亦樂乎，更讚嘆大自然的美。

可惜給我看到這如此令人感厭惡的畫面。

四人相約餐聚，卻各自玩手機，聚嚟做乜？俾錢坐在可以有個無敵一百八十度大海景，配以夕陽金光遍灑，但竟是望住那五六寸芒的藍光等食，簡直是眼冤。

回程時，已過晚飯時間，一直都搵唔到合心水的食店，最後還是回到屋企附近一間茶餐廳，他們由舊舖搬到現址多年，但都冇幫襯過，因為門口有吸煙位經常有食客在用煙餸飯，是早前才幫襯了一次，發現水準不太差，所以行過見到門口的Menu，有個自己最喜歡的窩蛋免治牛肉飯，便入去醫五臟廟。到碟飯來到時，方醒起，上次都係因為見到有呢個飯食先引到我入去，今次又係受唔住誘惑。

當等餐時，拿出手機觀看剛拍的照片，及刪去不好的時，老闆娘拿着碗湯上枱，斜眼望去，立時呆一呆：咁大碗嘅？（比一般食店大一倍）

記得上次中午去時，只是一般大小，之後事頭婆跟了一句：飲湯！

即刻放下手機擰頭一望，以為係娘親嚟咗，因為語氣太有屋企feel。但這位老闆娘看上去卅多而已，跟住看看碗湯，幾乎眼淚奪眶而出，是冇飲好耐的蓮藕湯呀，雖然看得出是由日間煲到晚，蓮藕已近乎變渣的瘀黑，但一樣的給我吃得一件冇剩，跟住見到有幾個似是熟客入內買外賣，他們好像是為這個湯而來，不停的圍繞這湯大聲講大聲笑，充滿歡樂氣氛。

湯的威力，真係大。

想起以前都以湯為題寫的一篇Blog：

湯

ATE: 09/30/2006 07:11:54 PM

湯，真是一種很特別的食品，全世界的飲食文化即使有多大的差異，但都會有湯出現。

以前看電影，連食人族都是捉了人後放進大煲水內煮，那不是煲湯嗎？哈。（後補：扶桑泡溫泉或洗澡都是用「湯」，可能靈感都是來自此）

而大部分的國家或地區都有著名的湯，如泰國的「冬蔭功」、新加坡的「肉骨茶」、俄羅斯的「羅宋湯」、日本的「麵豉湯」、韓國的「人蔘雞湯」等。

但要中國推一款湯來做代表的話，真的選不出來。因為中國的湯實在太多太多款式，我總懷疑有沒有人可以列出中國所有湯的名字來。

中國的湯，平貴都有，平的，隨便拿棵菜加兩片薑，滾兩滾便飲得。貴的，鮑參翅肚等名貴海味放在一起燉足大半日。而還有藥用補身的湯水，這類湯水只有中國款式最多，兼最有功效。

少時候就是憑飄來的湯香去感覺季節的來臨，夏季的都是些瓜菜清湯為主（最美味的是冬瓜盅），秋季冬季便是老火湯味道，西洋菜陳腎湯、蓮藕豬手湯、菜乾湯等都是我的至愛，到春季便是一些去濕的湯，如粉葛赤小豆、花生眉豆雞腳湯等。

湯，也像是一個好媽媽好太太的標籤，電視上的慈母都不時問兒女何時回家飲湯，或是總會留湯給他們回家喝。做妻子的如果不懂煲湯的話………，唔，怎麼說好呢？舉個例子吧，香港多年前有間著名的連鎖食店叫「阿二靚湯」，明了吧。

哈，原來中國婦女們一早已用湯來捉緊男人，而男人又會為一碗湯去找二奶，你看「湯」在中國人社會所佔的位置多微妙。

我的娘親及親友都愛叫我做湯王，有我在場的話，她們都會給我換上一個大湯砵來盛湯。自己閒來也會煲湯，一煲便是一大煲，喝不完便留待第二天，煮個麵或米粉再加上剩湯，極品，要不然拿來泡飯也不錯。

湯真的不難烹煮，難在心思而已。

在街上喝一碗例湯，與在家中用同等份量來煮的湯，味道都會不一樣，火路是其中一樣關鍵，在家中會先滾起後再較慢火慢慢煲，更要不時來回「睇火」，湯料徐徐滲出味來，飲起來會「柔」一點，但店子為了趕時間，必定用猛火逼出味來，甚至是用現成的上湯來掩人耳目，飲落口會較「搶」。

一碗靚湯，除了要令人飲到美味外，亦應要令人飲到親情及四季的味道。

COMMENT:

AUTHOR: joecancook

DATE: 08/13/2007 08:10:00 PM

有機會你嚟紐西蘭,我煮一煲湯你試試,或者我哋番香港見面時亦可以交流吓。西方的湯其實在香港不難做到,尤其係意大利湯,若有個磨菜的工具(moulin),那法國湯亦不成問題。

COMMENT:

AUTHOR: Oasis

DATE: 09/30/2006 07:39:21 PM

我好鍾意飲湯,有啖湯水真係唔同d~