上星期日赫然見到明珠台說播《第三類接觸》（Close Encounters of the Third Kind）呢齣英語長片，數數手指加埋腳趾都唔夠數，這片已是43年前電影。很多年前已買了DVD，不過年代久遠，估道電視台今番播是數碼修復版，所以都錄下來看。
說實在不太喜歡這片，因為男主角李察·德雷福斯（Richard Dreyfuss）演出太過浮誇，雖然他是影帝級人馬，但向來都是他在自我表演，這戲一樣，唔明點解佢要咁激動演出，其他在劇情上有他相同遭遇的人，都是平平靜靜的，大抵故事真係太平淡，只係話有UFO來探訪地球交流下，講完。開頭的失踪飛機及輪船重現，又唔去做故仔，點捱個半鐘？
但那個年代正值科幻潮，加上荷里活的電腦特技開始成型，所以在銀幕上看到那碩大無朋的飛碟，真係好興奮。
又係那一句，一接觸開的東西便跟着來，看到播《第三類接觸》有點愕然原因是，早在幾日前，在YouTube彈了一條視頻出來，是香港資深搖滾音樂人聲哥，他開了個頻道，見到的是講「月球背面」，幾年前已見聲哥在電視上大談UFO，看到他是頗着迷的。跟住撳了他幾條相同話題的片來看。
只是今次看，真的以為他被外星人上身，聲哥一直都是側面不望鏡頭，即是有人面對面同你傾偈，但全程擰歪面唔望你咁樣，不耐煩的更是聲哥拖慢節奏來講，睇到（聽到）幾乎瞓着，唯有飛段落睇。
月球背面故事及圖片，真係由細接觸到大，講來講去三幅被，一街都係嗰啲相，一街都係嗰啲榕樹頭故仔，做乜要講到發現新大陸咁呢？
聲哥扐住本番文書，意思指有人揭秘（冇乜心聽，類似意思），一本書就係真理？咁扐住本《笑傲江湖》跟住自宮就會練成葵花寶典嗎？聽到聲哥說書中那位NASA要人，當年被指派去燒燬高度月球外星機密證據，但嗰位要人又可以私自扐幾箱資料走，放咗入去一間大學度，後來又話俾人扐咗大部份走，聽到呢度，想唔掩住咀笑都唔得，要燒燬文件（當年應該是文件及菲林之類），搵個officeboy做咪得囉，機密文件？又冇人監督個要人燒燬嘅？咁高機密，點解唔擺喺火箭底，反正佢哋得閒就射火箭，一點火升空咪渣都冇囉，攪咁大餐大龍鳳做乜呢？
即係話，俾你扐得走，機密極都有限啦，夠你出本書嫌餐晏咁啦。
那些月球背面圖，都是拍得一些光及殘影，老實說，今日手機都拍到一億像素，但都係經常見到啲相有光影同埋殘影，只怪自己手震，何況係上世紀喺架飛船度拍？
我們這等凡夫俗子真係冇機會親眼目睹月球背面，都係靠睇相或者睇片，但唔好講人哋，又唔好講遠，中國的嫦娥四號上年年頭都去過月球背面啦，嫦娥五號啱啱又到埗，你話點呢？再唔係，火星都有架車仔周圍去偷窺，月球咁近，各國掟架車仔上去月球背面selfie一下，咁咪乜都清楚囉，而家又唔駛菲林嘅，唔驚唔夠菲林影啦。
美國阿波羅11號話於1969年7月成功登陸月球，成為歷史上首次有人類登陸月球，到1972年有最後一次有人登陸月球。足足隔咗48年冇人再去過，點解？
有說話太空人喺月球見到UFO，花旗國驚咗唔敢派人上去？所以都係留喺地球四出攪破壞？又有話見到有外星人基地，怕怕，唔敢再去。外星人基地喎，入面一定有超勁科技啦，點會唔再去取月經呢？冇錢？一個冇錢就印銀紙的國家驚冇錢？唔夠科技去，當年一部286級電腦要搵間複式豪宅先放得落，今日公園阿伯部幾嚿水老蓮咁大隻字嘅手機都可以上網啦。
佢哋唔去，第二啲國家點解又唔搵人上去呢？蘇聯、印度、日本及中國都去得吧？七十年代唔得，八十、九十、千禧、一零年代呢？
所以我都幾信當年登月係流料，目的就係引其他國家信以為真，耗盡國庫作太空軍事競賽，尤其當年佢哋最大對手蘇聯，可惜幾十年嚟冇人上當。
我信天外是有外星人，或者應稱為外星生物才對，用「人」作單位，只不過是自大的人類一廂情願想法，只是這些生物會來地球嗎？其實機會極微，剛睇過又或應是聽過港台一個講科學的電視節目（真係發瘟，而家電視或網上視頻，都係做到聽收音機咁，有時真係唔想望畫面，見住幾個人坐喺喺度講東講西，初次去扶桑見到啲悶到發瘟電視節目就係咁，估唔到要幾十年後香港先跟到），聽啲教授解釋第二啲星系是可能出現地球2.0，其形成條件都跟太陽系一樣，要有個太陽，星體軌跡合適便可，換句說話說，若果有生物，其生長形態或特質都跟地球生物相同，我們的體質是不能應付星際旅行，因為唔夠長命。以而家火箭速度計算，由地球去火星大約一年，那最近的地球2.0呢？最近的都是以光年計算。
光年不是以時間做量度，是用距離做單位，NASA的飛機最高速度紀錄是11260公里/小時，依照這樣的速度，飛越一光年的距離需要用95800年。自問冇咁長命，而外星生物睇怕都差唔多，即使有咁長命，嚟到地球都可能有老人痴呆，唔記得嚟做乜。
當然大部份人都都相信外星生物好似《第三類接觸》咁有超科技，可以星空中轉眼間已過百萬天，剛起飛，轉眼間已到宇宙邊，廣闊星際間，可以自由地往返。如果有咁高科技，嚟地球睇啲低等生物做乜呢？食住花生睇下我哋人打人？
沒有留言:
張貼留言