飯香

今日午間看到齣重播電視劇，講到他們煮飯做壽司的事情，最近又在閒揭特級校對的「食經」，重複看了數次兩篇相同主題的文章，都是關於米飯。

米飯是亞洲人主要食糧，很多國家或地區都對煮飯十分講究，看「食經」記載，上世紀初在廣州的八珍酒家，煮的飯已是遠近馳名，很多顧客到該酒家就是為吃碗飯，而煮飯師傅人工比其他廚師更高。

小時候也覺得在茶樓吃盅頭飯，或叉燒飯，米飯都比家中煮的好吃，後來家人說食店的飯是蒸，不是煮的。

那煮的不是不好吃嗎？那又未必，每到秋冬時間，香港的煲仔飯生意做到停不到手（呢段疫情時間則作別論），因為蒸飯就是沒有煲仔飯的飯焦香。

看過扶桑「煮飯仙人」村嶋孟的煮飯心得，與那齣電視劇所說都差不多，但有時想食碗飯，都係快手洗幾粒米，就撳着電飯煲煮，邊得嚟研究點煮吖。

但有點真係啱的，用甚麼米是會直接影響到碗飯好唔好食，屋企附近有間小菜館是間中都去幫襯的，看到他們貼出是用泰國某牌子的米煮飯的，初時便想，泰國米成日食啦，有乜出奇？見佢哋在間舖面放了個大電飯煲，以便侍應隨時裝飯給客人，心想又不是蒸飯，又不是炭火煲仔飯，家庭飯之嘛；但都點碗飯試，結果真比起周遭各食店的飯，都較有口感、咬口及有飯香，後來便去雜貨舖搵呢隻米，發現比其他的牌子略貴，不過真係自己煮都覺得有飯香及口感。

若要領略飯香，是有一個方法最得，就是肚餓。小時候試過太肚餓，等唔切娘親買餸回來，煲好煲飯就生吞白飯，食完一碗後，發現原來真係有飯香，吞完飯後，口腔還有一陣甜味滲出，先始發現，齋食白飯其實都係人間極品。

當然還有一種方法可領略飯香，就是如「煮飯仙人」村嶋孟回憶年輕時歷經戰火，曾經流落至撿麵包配雜草充飢，「能吃到一碗熱騰騰的白飯，就是人生一大幸事」。

相信冇乜人想咁樣領略飯香吧？