書展遊記

今年書展開幕那天，看電視新聞說入場人流不多，心想，疫情下的影響吧。

第二天乘地鐵經過灣仔時，看看天氣，竟達卅四度高溫，於是想：書展冇乜人去，加上都百幾年冇去過書展，不如入去嘆下冷氣，順便看看有冇想搵的書。

誰知一出地鐵站上天橋已見人頭湧湧，不禁有氣：又話冇乜人！

尚幸，雖然人多，但總算暢行無阻，好快入到場，只是行那段迂迴曲折的無謂路後，已全件笠衫濕透，入到場內果真人流不多，人不多，何解不讓人直接入場，而要左上右落的，見到不少老人家或行動不便的，心裏一陣酸酸的。

在場內轉了幾個圈，完全沒有書想買，搵到想要的一本，但發現並沒有減價，計計數，加埋交通費及入場費，咪貴過正價？而且本書成嚿磚頭咁重，最後決定放棄購買。

自從多年前書展混入𡃁模、名人趕貨書，弄至書展已無書香味，而發現同時間坊間的書店，會同步進行減價，實在沒有興趣再去書展。

今番重臨，見到多少情景叫人哭笑難分，那些慈愛的大人們，不停叫啲塞豆窿買書，到他們揀到時，又大條道理說這不好、那不好、屋企好多仲買乜？看看那群塞豆窿，只不過是遵從這群饒有大義的成人們來書展「掃貨」，他們只是來shopping，不知是來找書增智識，或許這班塞豆窿內心都明白，要找適合的書來看，公共圖書館已可以免費借閱，也不用拿個買餸車去。

當沉思在這畫面時，身旁一位胖妞，好大聲對她的同行們講：唔得啦，我忍唔住，要去買嘢啦！

轉眼便見她提着買餸車直奔店內，而場內的職員，大部份都很忙，人人拿住手機，看他們不是在看whatsapp，便是facebook，再不是便是新聞網，自己或朋友的相片……但也有些是很熱心的，一是賣文具的，一是那些乜乜慈善募捐機構，隨時從你身邊閃出人來，叫你看看世界上呢個幾慘，嗰個幾折墮，快啲簽名每個月去揼水救苦救難，但望見那班人，人人身光頸靚，件靚T制服起碼新淨過我件笠衫同爛鞋，再望下他們一大棚人，相信冇人係義工啩，再諗下他們的上司、董事們人工，扣除這些必要開支後，仲有冇一個幾毫可以去到真正有需要的人手上呢？他們何不直接踩去在世界上撩事鬥非的國家，請他們從那些戰略經費中，抽出億分之零點一來，已可救活無千無萬人，我扐錢救一個，他們一枝飛彈已炸走幾百個……

轉頭不禁問自己，不是來書展嗎？

行出展場門口，見到有李小龍的展覽，有很多未見過的照片。

也有人在作導說，旁邊一位員工有禮貌地遞上一本小冊子，原來是書展的其中一個項目──文藝廊，除了有李小龍展外，還有兒時讀物《兒童樂園》展，有已故創辦人羅冠樵先生的手稿外，還有他的墨寶展出，他的繪畫功力極深，值得細意欣賞，還有當年書內的其他畫師原稿及上色手稿，方始留意畫功之精細，畫面也極具心思。

放眼今天如要同樣的繪製，為未來棟樑去出版這種兒童書，可能會給人笑是傻仔威，隊部電話俾個塞豆窿咪得囉！嘥氣。

歎完冷氣，件衫都乾得七七八八，又係時間講拜拜，去書局睇下有冇減價書買。