滿漢全席

仍在偶爾揭揭《末代皇帝皇妃秘聞》來看，正文已大部份看完，一些紀錄資料跳過不讀，剩下的是多篇副文，大抵是當年在報紙連載後的作者專欄吧。

昨日揭到一篇「談滿漢全席」，立時醒神，這個聞名遐邇的宴席，即使看上世紀五十年代的《食經》，都說已失傳菜單，只聞香港曾辦過一次，但都不見有幾多資料流傳。

這篇專欄竟列出了二百多道菜出來，雖則作者都說不能作準，但雖不中也不遠矣。

看完這個菜單，並沒有預期的華麗菜色，就算見到熊掌這種被禁菜，也不覺稀奇，因小時候跟祖母行國貨公司的食物部，在一些冷藏櫃中，常見到一整隻熊掌，隨便跟雪藏黃花魚，或整隻已劏的兔仔放在一起賣，也拿起過玩，所以不覺如何名貴。

菜單中卻不見傳聞的猴子腦，如果要跟這菜單做一次「滿漢全席」，五六十年代香港是輕而易舉，因為食材基本上全都搵到，看勻只有斑鳩及馬牙肉有點難度，斑鳩應是野味，好似未聽過有人食，香港冇，大陸應該搵到；馬牙肉就確實撩棱，真係馬的牙附近肉？日本有馬肉食，但都未聽過有馬牙肉，上網查，原來是五花肉，只是做出來似馬牙而已。

所以做一次難度大是在於要幾多個爐及師父一齊做，又要煮幾多圍？分幾多日食呢？

看完整張菜單，翻看又翻看，鮑參翅肚，就欠鮑魚，點解呢？滿族是大草原民族食慣野味，唔食唔出奇，但漢族冇理由唔食喎。

另外，有種大眾食菜又是不見，就是牛，唯一一樣肯定的是黃心管是牛的，那些丸子都或者有牛丸啩，但以牛肉為饌的，一碟都冇，咁離奇？

不過想想，由細到大去飲宴，菜色中真係冇牛肉喎，牛肉係上唔到大枱？咁嗰啲A乜A物和牛做乜收人咁貴？

不過更離奇是，連末代皇帝溥儀都未食過滿漢全席……