可樂雞翼

中午看到電視重播的一個飲食節目，當中女主持弄了一個「可樂雞翼」出來，立時回想起一些事情。

現在這味菜間中都會出現在部份食店內，但應非主流，其實它的出處是在那裏呢？冇人答得出，不過曾經有跟這味菜的經歷，但不代表是出處。

八十年代，初出社會打工，午飯時間，有閒錢便會在公司樓下，幫襯一輛快餐車，這小型客貨車，被幾個後生仔改裝，打開車尾，便是一個販賣位置，放好一格格的餸菜，情形一如現在的賣幾餸飯模樣，但那時不理幾餸，都只是叫作飯盒，而且很環保，是紙盒，冇膠袋跟，人人拿個飯盒回公司或踎街邊吃。

幫襯多了，都算熟絡，他們好有年青人的特色，就是肯試新東西，間中會做些新菜色來賣，有一次其中一個老闆一見到我，便推薦這味「可樂雞翼」，一聽到時眼都瞪大到爆，用汽水煮東西？咪甜到漏！

老闆解釋，佢好鐘意飲可樂，忽發奇想，用來煮雞翼得唔得呢？於是就試下，出來覺得唔錯，沒有太大汽水味，所以第二天便做了出來賣，還跟我分享他試做的過程，原來都試做了幾次。

印象中是有幫襯，那雞翼不是電視見到的咁深色，與一般煎雞翼差不多顏色而已。食落也沒有多少分別，後來架快餐車冇再賣這味菜，問老闆點解唔賣？佢答唔受歡迎，啲客唔受用汽水煮菜。

之後隔了很多年，偶爾發現有些食店會做這味可樂雞翼，每每都想是不是那位老闆做的呢？