邊度都冇外星人

最近看一個電視節目時，都不斷在心中指駡，最新看那一集，甚至鬧出聲，這節目名叫《邊度都有外星人》。

之前一輯《邊度都有陰謀》已經睇到頭都側，一向都喜歡看這類講UFO、外星人或一些傳聞，雖則都知是永無答案，但都抱有八卦心態去看去聽。

但呢個節目搵來甚麼嘉賓？只怪本人孤陋寡聞，基本上完全唔識那些人，個個都係扐網上幾廿年前資料噏，兩個主持唔知係咪都頂唔順，經常插科打諢，但鏡頭前又要扮無知，要好似完全第一次聽到咁，見佢兩個都無意之間窒吓那些嘉賓，由其那個小鬍子，見佢有時被窒到張口結舌答唔到。

上一輯《邊度都有陰謀》個嘉賓主持講埋啲乜乜會物物會，又蜥蝪人又小灰人，以為有乜新鮮嘢，結果都係啲咸豐年前睇到唔想睇嘅所謂秘聞，有次講到MJ，話係要靠乜乜會先有咁爆紅，真係笑到收唔到聲，MJ出《Thriller》係1982年嘅事，佢老人家都唔知出世未？《Thriller》隻碟幾乎首首Hit歌，仲要Hit到個人離世仲Hit緊，要靠乜乜會？佢知唔知MJ豆丁咁大個已出嚟賣唱？仲已經好紅，唔係一朝爆紅嗰啲偶像，人家係靠努力實力，先有咁嘅成就！所以有時睇錄影，飛片都唔想，直情閂機。

到呢輯《邊度都有外星人》播時，已奇怪一星期只播一集？睇一兩集已知乜事，又係嗰位仁兄，乜嘢外星人輪迴、投胎，又係蜥蝪人小灰人，哥仔，唔好成日耷低頭睇手機，上網copy人哋口水啦，抬高頭，望吓個天有幾大，得呢啲外星人？有冇睇過超人片呀？

有一兩集換咗位香港飛碟學會會長Moon姐，講啲嘢有番啲根據，不過都係嗰句，咪玩啦，五十年代拍到咁清楚UFO，今日成億像素手機，但見到架UFO都扐唔切出來影啦，嗰時隨手扐到相機影？華富邨當年架UFO，成邨人都見到，但都冇人扐到部相機出嚟影。而家扐到手機出嚟，連飛機都影唔清，五十年代影架UFO咁清楚？用支咩鏡？

講番今集，嗰位仁兄竟然拉埋達聞西落水，話佢幅「救世主」名作，當中個水晶球三粒星係暗示天國的位置，重點係話呢三粒星係對照獵戶座腰帶三粒星，真係想唔鬧出聲都唔得。

獵戶座腰帶三粒星，並不是甚麼神秘星體，香港光污染咁厲害，但只要夜晚天清，隨時都可以見到，早前自己都影過（下圖）。

即使未見過，上網搵都搵到圖睇，幫你搵埋嘞，望吓下圖啦，見到三粒星點排未？主持人陸永負責推波助瀾攪吓笑，OK，但鄭子誠一副有識之士模樣，冇理由都……

看聽呢類外星人故事已幾廿年，以前細個係石器時代，個世界係點都係估估吓，靠啲新聞或書刊取得資訊，是耶非耶無得查證，但去到今日，火箭都登陸埋火星，鬼影都見唔到隻，仲成日話外星人匿埋喺地球，至無敵攪笑，呢啲外星人專家，認為外星人只係識英文，淨係同洋鬼子打交道，莫講話中文，連日文、法文、葡文都唔識講，呢啲唔係笑料係乜呢？

自從手機普及，有圖有真相，有冇發現呢類外星人新聞冇乜新料？麥田圈都一樣，點解呀？因為一街都cctv……

外星人話題而家好值錢，各大專家都喺YouTube開頻道搵錢，仲上電視咩？電視台搵唔到人，但都唔好求其拉伕啦。

話說回來，宇宙間點會冇外星生物？但係咪一如科幻小說或電影般，任意穿梭不同星系、星球？若果外星生物結構跟地球生物相若，那便不用想有外星人來訪地球。

若然不是呢？

那就記住已故霍金的說話——來者不善。