反胃

看到之前晚上有阿爺煮食節目，不過加入一個自己不喜歡，佢話識煮食的女歌手，想看的意欲減了一半，但見加入了一位年青女主持，心想，或者不會齋煮吧 ，有些新意也未定，所以都開來看看。

結果，看了幾集，忍不住關機。

那個女煮持，由她當年在收費台話識煮菜時，已極之質疑，她不停說後生時由朝做到晚，返足幾份工，仲要收工煮飯給屋企人食，所以有幾十年入廚經驗。

自己幾歲人仔時，娘親只做一份工，但不時趕不切回家煮飯，便會打電話吩咐我洗定米及菜，間中仲要煮埋炒埋，她收工後回家再煮多一兩味菜。

而那女煮持說做幾份工，仲有時間買餸煮飯？餐餐食魚生？都要時間劏魚㗎！

到後來，那個收費台加入了一個猛人——高師傅。

人家一埋牙，高低立見，女主持只不停的做騷，扐住個鑊剷左講右講，左了右了。

但凡廚師，只會專心煮，少說話，所以通常會加入一個幫口的主持人，那女煮持則是不停口，道聽途說，當時電視台請了另一個廚師，每次教她依樣畫葫蘆。

未幾，那位高師傅擔正做主持。

今次，有一集看到她用榴槤壳煲湯，其他人都愕然，佢話語間雖然沒有明示是佢發明，但暗示到令人聯想是她創意之作，實質N年前高師傅在收費台中，已示範過，當時看到我眼都大埋，也可敢說是電視史上第一次見到，當然收費台觀眾有限，加上都咁多年，都冇乜人好似我咁仲記住。

再看另一個年輕女主持，心想，新舊思維互動，應該會有些火花，但節目中，只不停聽到個阿爺叫救命及發火，人家炒好一碟飯，佢竟然說不食飯……之後呢樣唔食嗰樣唔食，就算食都是用筷子夾起放在咀邊，睇見阿爺眼中那團火，真想看他出拳……到看宣傳說那晚一集，阿爺會講他與李小龍的過往逸事，所以又開來看，卻見那大小姐九唔撘八，隔住個芒都感受到那阿爺想出李三腳！

叫那大小姐返冥王星介紹薯條，漢堡包啦，唔好浪費佢個冧仔樣，傳統中國菜佢點食得入口呢？人食㗎嘛。

最後一兩集時，撳過去看看，咁啱阿爺又是在叫救命，立時關電視，打機去。

真係寧願睇返阿爺配玉瑛姐姐。