昨晚追月後，冇電視好看，於是找其他東西餸紅酒，找到一個N記出品的《邂逅UFO》紀錄片，但都十五十六看不看，因為之前看過幾個紀錄片，都唔知佢哋拍乜，講扶桑動漫，拍到MTV咁，畫面閃來閃去，口水多過嗲，看了五分鐘都唔知想講乜，關！另外的史前乜乜（唔記得佢哋搵乜），話要深入地底，講話好難去到，但鏡頭明明擺好等啲探險家落去喎，真係當啲觀眾幼稚園未畢業？關！
所以都諗住睇睇就熄機，結果，又係口水貨……UFO？得一兩個黑白畫面，大家喺網都睇過不下萬幾次。
今次講自由大國德州，有幾百人曾目睹天上有無數光點出現，主人翁是一個有錢有飛機的阿伯，他目睹當時畫面，但唔知點解佢因為面子問題，唔敢同人講，後來忍唔住打去報館，報紙隨即做了即日頭版新聞。
最奇怪的是只有文字報料，又冇相，報館都去做頭版？
之後，報紙竟然賣光，更有數百人說都同時目擊，爭相出來講（又點解之前冇人出來講先？而報館班記者瞓晒？），結果引發到其他傳媒到訪，小鎮變成羅茲威爾般。
原本都唔想再睇落去，因為全部都係得個噏字，冇片冇圖，幾百人都冇人扐到相機拍？2008年手機已可以拍照，即使冇高像素，都起碼有個影吧？
但都繼續看下去，因為有戲劇性事情出現，主人翁說開始有疑似官方人士介入，要他們封口，及出現如MIB，亦是UFO界流傳的黑衣人，最初收到電話的其中一個女總編，突然被炒，上班時發現枱面電腦及一切都被沒收，另一位主力報導的女總編，後來亦離世（冇交代是否跟這事有關）。
看完呢集後（原來一共有四集），整個劇情是有如史匹堡當年齣《第三類接觸》，不論人物及事件，那個阿伯便似電影主角Richard Dreyfuss，見了一次UFO，便陷入瘋狂，但現實的跟電影不同，因為那個阿伯是懂駕駛飛機，天空出現的異像，他是見怪不怪的，所以他的說話可信性極高。
當然，最後都是帶着失望心情關機，嫦娥又見唔到，ET又得啲榕樹頭講故……去瞓覺發夢好過。
一覺醒來，看到FB的當年今日，咦？……見到八年前一段紀錄。
當中公司的小妹妹談到的事件，正是1985華富邨集體目睹UFO，覺得神奇之處，是她當年的形容，跟昨晚紀錄片阿伯及其他目睹UFO的人，所描述情形是一樣，都是UFO出現時冇聲冇氣流，及突然消失……相隔幾十年，地球上還沒有發明到如此飛行工具。
還是……當年華富邨的UFO，根本冇走過？
再者，原來到今天，自由大國仍是在神秘處理UFO事件？其目的是甚麼？
沒有留言:
張貼留言