牛丸湯

在上世紀宣統年代，當時剛升上初中，到學期末，暑假開始，同學們便相討到那裏找暑期工，好幫補來季書簿費，以減輕屋企負擔，及搵番一點駛用。

那些年，省城滿佈工廠，工廠區內除了工廠妹萬歲外，還有工廠少爺，但一般都唔多會請暑期工……與同學便佯稱做長工，工廠是隻眼開隻眼閉，反正乾隆年代的工廠，不停要加班，人手根本唔夠，明知是暑期工都請住先。

人工雖然話係跟長工一樣，不過是新丁，銀両自然唔係多，在康熙時的工廠制度，都是半個月發放一次糧餉。

第一份暑期工是在土瓜灣銀漢街返工，平時中午食飯，與工友會到廠附近一間舊式茶樓開餐，上到去，一張十二人大枱，不相識的客人都坐在一起，枱上放了兩三壺茶供客人任飲，而各人都是點碟頭飯，還要是最便宜那種。

這茶樓有一樣特色菜，平時不太多人點，但只要客人手頭銀根鬆動便會要。

我們都是當每半個月出糧餉後，第二天上茶樓，點完碟頭飯後便會各自加碗……牛丸湯。

一碗高湯，放上大約六粒𠝹了花的牛丸，再灑上蔥粒，湯鮮冇味精，牛丸爽而彈牙，是真正手打牛丸，牛肉香味由口腔正達天靈蓋……

記得當時是約收個半大洋一碗，咸豐年代，一碟碟頭飯價錢都是幾個大洋，所以計落碗湯不是便宜例湯，故此有銀両先會叫。

完成暑期工，返回學堂後，間中都會約埋同學走返去食碟頭飯加碗牛丸湯，可惜，未幾這茶樓可能因太舊，而結業了。

曾到不同食肆食牛丸湯，只是一間都做不到當年食過的味道，不是味精湯，便是牛丸不是味兒，現在一般更是加工牛丸，都是假牛味……

自己都不時為了想回味，會動手做碗食，其實沒有高湯都不要緊，但一定要有新鮮靚牛丸（自己買的大約一百個大洋一斤，還要季節限定，只有入冬時才有，天氣開始熱便停售，牛肉檔說，因為打牛丸時有熱力加入便不成），每粒牛丸切半後再𠝹花，放在水中滾起，自然便有牛肉湯，再灑上蔥花，雖然都未達到光緒年時所嚐到的滋味，但都不遠矣。