近日那個垃圾徵費計劃，真係睇到人搖頭嘆息。
自申，真係冇認真留意個計劃，本身一直都想為環保出一分力，也以為這個計劃已有完整方向及藍圖，可是一直看下去，只覺得佢哋不過是不停要人用那些綠色膠袋……
過往市民用開的垃圾袋唔准用嗎？是因為有問題？那之前買落一大堆垃圾袋點算？
有人試過話呢啲綠色垃圾袋並非十分理想，如有魚骨會易穿，話事人答話那用膠袋包好魚骨，再掉入綠色袋內……
吓？你唔係講緊環保咩？
未回歸前，當時的政府都已提倡過要攪環保，到回歸已成廿幾年，都係得個講字，到埋牙要做，原來乜都未做好，要呢度試，嗰度試，唔係要市民陪你哋玩呀？
其實個口號一早講咗要點做啦——源頭減廢吖嘛，你哋搵下游生物來攪做乜呢？
那些多餘的包裝物，是那些人做成？
生產商囉，甚麼東西都包膠、貼貼紙。
外賣的、超市的，都是數之不盡的膠及廢紙。
當然，市民自是主謀之一，買東西少啲膠，又話這唔衛生，那唔衛生，要報東張，要放上網公審。
所以話用那些綠色袋就可以幫助減廢？係咪天真呀？
用者自付呀，那些不願環保嘅，咪俾多啲錢囉，對佢哋來說，有何大不了？加煙仔稅，咪俾多啲錢買煙囉，真係因為加價去戒煙，有幾多個呢？一街都係未夠稱𡃁仔𡃁妹揸口煙通街行，有人理咩？
知否香港由幾時開始藍廢紙黃鋁罐啡膠樽這個安排？係耐到上網都搵唔到日期。
結果呢？
那些箱係依然存在，只不過一係唔見有，一係俾人當多幾個垃圾筒。
話有呢類分顏色箱開始時，真係滿懷希望可以有幫助，但長久以來，有幾多地方實行過，做到過？
當年一推出時，自己都諗住一定幫手支持環保，但一睇到啲規則……飲完汽水，個罐個樽要沖洗乾淨，裝過液體嘅，要清潔好，少少污垢都唔得……
喂，究竟知唔知如果要咁乾淨，會用多幾多水及清潔劑？浪費不特止，還要製做污水繼續破壞大自然！
一見到咁，算吧啦，反正都不是常飲用或買，垃圾直接送去堆填區，仲不會咁破壞環境。
到數年前，見樓下有這幾個箱出現在街上，也眼見家裏垃圾筒內，經常都是填滿塑膠樽、膠包裝等癈物，那是因為生產商，已變本加厲的駛用塑膠包裝，真係睇到眼火爆，於是便開始自行分開垃圾，再拿到街上放入不同的箱內。
可是跟住發現那幾個箱根本負荷不來，附近街坊不少都是同一做法，只是食環回收時間極少，結果垃圾堆滿箱內，甚至擺放到在箱外，再加埋冇公德心的路人，當那些回收箱如普通垃圾筒般，甚麼垃圾都抛入去，最後如何解決？
他們選擇斬腳趾避沙虫，搬走那些環保垃圾箱。
之後發現是搬去對面街公園內，滿以為旁邊有食環外判管理，會好得多，自己亦不介意行條天橋過去掉分類垃圾，可是見到的還是以前的畫面……最近一次拿兩袋塑膠去，見到垃圾已堆到出來，有位外判食環嬸嬸見到，便叫我掉入她那架垃圾車內，我話呢啲係膠樽及膠袋，想掉入那些環保箱內，嬸嬸答話一樣啫，嗰啲只係係做樣。
我相信嬸嬸沒有騙我，因為以前都見過那外判食環都是如此，只不過話俾自己知，時運高睇唔到，繼續呃自己係為環保出過一分力嘅好孩子。
再看看那放膠樽的桶，甚麼垃圾都有，隔離便是食環外判工作位置，原來他們是不會理會其他人如何處置垃圾，這又難怪的，一來是外判，二來，看到都是六七八十歳的老人家，要他們去糾正那些垃圾虫？想他們早點埋單咩？
咁多年至討厭聽到的說話，就係：參考外國的例子……
香港得豆腐膶咁大，唔係唔知呀？外國？或其他地區隨手拈來都大過香港幾百倍啦，學乜嘢人呢？
舉例扶桑，不講他們不理全世界反對，都要倒核污水落海住，單看扶桑城市似好乾淨，街邊十幾廿年前已減少垃圾筒，垃圾自己帶走處置，但這唔代表就係環保，佢哋乜都包膠，食又包，書又包……哪裏的便利店，是到近年才肯減少用膠袋。
其他國家地區都是差不多，那參考甚麼呢……香港就得咁大，揼兩個月車，成個香港都去勻晒啦，乜都睇清晒市民習慣，再對症下藥咪就得，政府每年泵咁多水入大學，點解唔搵班大學生幫手諗橋，甚至落手落腳做？並唔係走去沙灘執垃圾嗰啲show，而係度身訂造為香港解決垃圾機器及策略。
就以塑膠鋁罐為例，這些東西體積佔用了大量空間，那便要改造成專用垃圾筒，只要隔一段時間會自動開關擠壓裝置，把那些東西撳扁，回收時便減少了不少空間。之後便要想這些東西如何再造，雖然現在都有這些做法，但未見效果，那就交俾那班大學生去諗囉，中小學生都可以一齊諗，一些創意好主意，未必一定要高學歷才想到。
或者未必全部學生願意參與，但總信會有一兩成的，而也未必一下子便成功，試過一次唔成功，咪下次囉，反正都攪咗幾廿年，唔爭在俾啲時間有心人去做吖，駛乜下下都話一千幾百億搵乜乜專家去評估俾建議呢？
另外，一天到黑都說循環再用，原意是對，但今天面對的是氾濫物料，小時候食完一盒朱古力或餅乾，大人便會收起鐵盒，的士司機用來做錢箱，三行師傅用來放工具，主婦用來放針線……因為當年的包裝不多，也一年食不到幾次，但今天？一日買幾多次外賣？膠盒膠食具一大堆，這些東西換轉以前？一份可再用一年，而家日日幾乎都有一大堆補給，留嚟做乜？買一次外賣，一次網購，跟住丟棄的廢物有多少？裝滿半個垃圾桶已是閒閒地，所以近年一到內地的光棍節（雙11），看新聞見到那些出貨箱，仲講乜嘢環保呢？源頭減廢？點解唔向全球這類網購站徵收費用呀？
專家不停都說塑膠破壞大自然，要用幾多百萬年才可分解，又話唔可以燒，因為會破壞臭氧層……
我信，但我會話應該燒晒佢。
你講要珍惜地球咩，那邊廂日日放飛彈炸呢度炸嗰度，破壞份子燒呢條車軚燒嗰堆車軚，唔會破壞臭氧層咩？一日唔燒那些癈膠，便不停破壞自然生態，看幾多海洋生物吞下塑膠？被塑膠纏死？
講到尾，要源頭減癈，就要向製造這些多餘東西的人徵費，分開包裝一個價，不包裝一個價已是一個方法，不是說笑，購物袋徵費已是成功一例，當初是覺不便，但現在不少人買東西都習慣不用袋，到真的要便主動付費，所以很多人是願為環保出分力，甚至是付費，但是要付得明白及有價值。
早排TVB個黃金台，重播《香港81》這處境劇，看到當年不少民生，其中一集見到順嫂去買餸，便是自備買餸籃，街市賣菜賣豬肉的，稱好便放入她的買餸籃內，而黃新的小食店飯盒，是紙盒外，客人都是買完便扐住個飯盒走，多環保。
近日看到話要人用紙造的餐具，咁會環保好多，想問聲，知唔知紙係等如砍樹？定係用循環紙造的呢？以前的紙飯盒都要加上錫紙先可以用嚟裝飯，而家用齋紙盒？好多打工仔趕時間，買定盒飯，分分鐘二四個鐘之後先食……唉。
不要講徵費，我覺得最急切要做的，便是每天增加收集這些癈膠時段，不要任那些垃圾堆到成街都係，還記得過年時那些甚麽綠在區區，變成垃圾區區的新聞嗎？
沒有留言:
張貼留言