食物的味道

看了幾集電視台新煮餸比賽節目，由藝員跟一個專業大廚作為隊友，但……真係睇到搖搖頭。

藝員煮唔到專業水準，這是無可厚非，但都要有個譜，看那煙肉生蠔，一大堆煙肉冚上面，隔住個芒都知鹹到趴街，另一個燜魚碩，竟然晨早就加蔥？最要命是學人淋酒落煲面，酒同燜魚係絕配，會釣出魚鮮味，不過淋酒喺煲面，係為咗上枱時有酒餘香，是唔會滲入菜裏。

藝員係咁上下水準是意料中事，但個女大廚，好似完全唔識整咁，燜個伊麵，仲要有龍蝦，都好似初哥般，評判一句，佢又話跟住改，心諗，妳似嚟呃飯食多過煮飯，呢味咁簡單菜，要人教？

有龍蝦喎，求其煮個即食麵，擺隻龍蝦落水度滾兩滾，加少少鹽，已經神仙都企唔穏啦。

其中一集，評判大廚指參賽者，沒有加重肉的底味，還食到羶味（不是羊）……聽完又是呆得一陣陣，貴為大廚，用其他調味料去除肉本身味道？

我估他的意思是肉的雪味未清吧？

任何食物都會有本身味道，飯有飯香，雞有雞味，牛、豬、羊、魚都各有味道，甚至蔬果都是，如苦瓜，話明係苦，但偏偏有所謂大廚，教人去晒苦味，羊肉係人都知是一大陣羶味，亦都有人振振有詞教辟羶味……

自己唔食得辣，咪唔食辣囉，一聞到羊羶便反胃，咪又唔食囉，我唔食啫，其他人食的嘛，為乜要就唔食的，去破壞原有味道呢？

如苦瓜又稱半生瓜，意謂捱咗大半世，嚐盡人間甜酸苦辣，便會接受苦瓜的苦味，那你去晒啲苦味，咁我駛鬼捱半世後先食呀？冇晒苦味，仲叫苦瓜麽？所以改叫涼瓜？荒天下之大謬！

自己煮苦瓜是從不汆水的……以前常對娘親說：去晒羊羶味，不如食牛腩啦，妳哋想食羊肉咪自己食囉，駛乜理我啫，又唔係冇其他餸食，就乜鬼我呢？我見妳哋食得開心，我都會開心的嘛。

每種食物的味道，都會令喜愛者記住，而煮菜時加上調味料，主要還是帶出食物特色，絕不是搶去味道……現在經常見啲所謂主持人，本末倒置只會說配料味道，而不是主食的煮得好與壞，當然，睇見平時啲廿零歲𡃁妹仔做所謂飲食節目，佢哋食過幾多好嘢吖，充其量食得最多咪老麥、炸粉雞、鬼佬鹹煎餅，佢哋拍時加兩句好好味呀，跟住話食裝修囉，咪交差囉，所以佢哋介紹我食好嘢？咪玩啦，食裝修？外賣係咪加兩嚿磚俾客呀？而家一見便轉台。

有些菜根本不用太多配料，如朋友愛釣魚，有漁獲時拿到酒家起肉炒球，泡一泡嫩油，炒兩下便上碟，又或是簡單清蒸，吃時便會食到啖啖魚香。

加重手的便是骨腩等，油於骨多，炸脆加椒鹽，但咬落還是食到魚香。

甚至香港元祖兩餸飯——雞鵝飯，飯有飯香（因為大多是蒸飯），雞鴨鵝叉燒燒腩，都不會因調味料而搶過本身肉味。

而加重香料煮的菜，大部份因為是唔新鮮，東南亞菜大部份如此，點食都食唔到主肉的鮮味，不過加了那些香料後，的確是另一番風味，那要看你本身想吃甚麼了，每人的口味都不同嘛。