自從看到公布N記製作的《ULTRAMAN：崛起》時，望見那比庵野秀明災難式新．超人，更骨瘦如柴的超人，又一再嘆氣，跟住又見到那電影其中一份海報，望來望去，硬係覺得好眼熟，有陣似曾相見感覺，看看那超人，又係有呢份同樣疑問，點解咁似老翻？……猛然醒起，數年前國內拍了一齣超人（他們叫奧特曼）電影，但被指所買的版權不合法而禁映……
立時上網找找，找到這《鋼鐵飛龍 奧特曼崛起》，未看過這片，但看見那些劇照，現在是……老翻上翻？人家崛起，你又崛起？小朋友着超人T，你又係？
係咪拍緊《超人特攻隊》呀？隻怪獸仔咪《超隊》第二集個BB囉，一樣會放死光。
父子恩怨？個主角廿零歲，個老豆竟然成八十歲咁款，話兩爺孫似啲，用計數機撳下，個老豆頂多咪五十幾，係碌柚咭都未有得攞，何來咁老（以那年代一般人卅歲前生仔計）？
成齣戲見個超人，一味走來走去，打來打去，都唔用死光，心諗，係咪真係睇緊《超人特攻隊》？……
再望個超人，你叫得做ULTRAMAN，就應該係元祖超人吉田（香港初播超人片時，主角被改名做吉田，叫到今天），因為所有超人家族成員都係有個別名稱，即使庵野秀明拍的，都用上新．超人。但現在呢個造型與ULTRAMAN完全兩回事，首先眼係藍色的，一身都是似係肌肉。
如果熟識超人系列的，都會說這是1995年的Ultraman Powered，那是円谷繼超人G後，再一次交由外國拍攝的片集，無獨有偶都是由美國負責，這個超人Powered胸肌下零舍多一層肌肉，跟這新超人一樣……
之後出現的老超人，一望個樣，自然又想起在美國上映過的，超人卡通Ultraman:The Adventure Begins中的其中一個超人。
一路睇， 一路留意片中細節，真好懷疑，他們原本應該是拍七叔公ULTRA Seven。
片首他們家中是放了七叔公警備隊頭盔，而不是吉田的科巡隊。
之後伯爺公超人去搵個仔時，是要用拐杖幫助，當年七叔公完成自家片集後，數年後到超人LEO片集中，以第二男主角再上場，開頭因工受傷，打後便要用拐杖，而伯爺公一直都是戴着紅色眼鏡，十足七叔公變身眼鏡，之後他開車走，見到車牌是M78-U7，咁，唔駛講到明吧。
男主角亦是七下七咁，他在球隊是穿號球衣，飲的是7啤……
奸角是伯爺公的警備隊KDF領導，他們穿的制服，基本與七叔公警備隊的款式相同，而他們的警備隊名稱是KDF，七叔公的是TDF……
後來男主角坐自己私人飛機，熟識七叔公片集的，都會咦一聲吧。
超人粉絲都知七叔公與警備隊的安娜是有一段情，在大結局中，那段浪漫情節，名留到今天，最後兩人都要分開，七叔公離去返回M78星雲，後來？七叔公有個囝叫ZERO……而且同樣地係好有個人性格。
當年七叔公片集中，不少怪獸都是機械人，如king joe等，與這片打機械獸源出一徹。
所以綜觀以上論點，這片根本是拍七叔公，而不是吉田，加上上年是他啟播55周年，估計拍嚟賀壽，不過上年周年紀念迴響不大，才臨時改為吉田吧……？我估咋。
片中的超人，除了俾人成身發光感覺外，便一無是處，去東京鐵塔救隻怪獸仔時，竟然係爬上去，大佬呀，超人係識飛㗎。
而且故事的恩怨，真係唔敢相信，係之前晚間看的《笑看風雲》一樣劇情……江毅對鄭少秋，一廂情願私人恩怨，同外人無關，救命。
超人吉田即ULTRAMAN，當年打下江山，再帶出之後的超人兄弟，只能用殿堂級特攝英雄來形容，而吉田由開播後，是再經過兩番改良，最後以type C姿態完成劇集，type C亦是多年來，粉絲們認定唯一超人的形象，只是之後円谷並沒有好好打理這個無數人的偶像，卻一而再，再而三拿去任人破壞……
這齣片，試問真的是重新塑造吉田？不提同七叔公撞橋，單係佢唔駛用變身器變身，已叫人側頭。
超人系列中，來到地球再變身超人，基本上全都要借助變身器，吉田是用港稱為的太空囊，而只有超人阿鄉是不用變身器的，即是這片主角變身方法……
咁，呢齣片真係唔關吉田事，只係似一齣四不像老翻片。
沒有留言:
張貼留言