月餅

花旗契妹子是月餅痴，八月十五未到，已經傳來她今年的戰利品月餅照片，竟然一盒有四種口味，單黃白蓮蓉、純栗蓉、黑芝麻及單黃紅豆沙月。

以前試過想寄盒月餅去花旗國俾大小姐賞月，但去郵局詢問時，說不能寄，因為有蛋……

今次見到大小姐的開心「些牙」，突然又想寫寫月餅二三事。

很多年前，香港一間西餅推出冰皮月餅，誰知超受歡迎，直到今天，一近中秋節，個個地鐵站都見到大量宣傳。

好像曾嚐過一口，立時狂飲水，一則白色皮已叫我聯想到牛奶，自己是受不了牛奶，聞到都想嘔那種……那冰皮月餅受歡迎後，商家們立時推出不同口味、古靈精怪的月餅來，這麽多年來只感覺那些不過是西餅。

傳統月餅，一直只認為只有淨蓮蓉（黑及白）、有黃蓮蓉及五仁月餅。

因為小時候屋企人都是供月餅會，每年都是去取這些月餅；當中五仁只有大人會食，其他小朋友會搶有黃的蓮蓉月來食，而一直都不明白做乜要食黃呢？娘親滾個節瓜湯時，已有成個鹹蛋黃我食，要食，梗係食淨蓮蓉啦！

而至愛吃的，還是跟月餅會送的花餅，用個塑膠豬籠袋住一件豬形餅，又有人叫豬籠餅，是做餅皮的剩料來做，大人細路通常唔食，嫌乾過個荷包，及帶有少少苦味（是烘焗味），自己則覺得好味。

及至在上年，於網上看到一張圖片（下圖，不問自取，借來一用），立時呆了一呆，這張於上世紀1951年印刷的，香港名茶樓「高陞」出品月餅目錄及價錢單張，赫然見到當年原來已有冰皮月餅？原來不是那西餅店發明？

再看那目錄，那年代的月餅，原來更古靈精怪……燒雞月？係咪雞扒包咁呢？蓮子臘腸月、五仁叉燒月、玫瑰甜肉月，咬落口，係咩感覺呢？駛唔駛加碗白飯送口呢？

救命，原來自己是如斯孤陋寡聞，傳統月餅竟有咁多款……

嫦娥奔月、西施醉月及銀河夜月，又是乜冬冬呢？

再望望現今的月餅款式，同以前比，真係差十條街。

其實由細到大都覺得，大人食月餅時，都是苦口苦面，無人食得開心，因為那年代，這些節日都要四出送禮，長輩親戚、上司等都要孝敬，至少一人一盒，預啱大家族都幾頭痕，所以才有供月餅會出現，唔駛一次過攞咁多錢買月餅做人情，供足一年，攞番本月餅外，利息就是花餅，仲要放入豬籠內，美其名祝君豬籠入水，實際係隱喻慘過浸豬籠……

雖然人家都會送來月餅，但都係左手接，右手送番出去，到送完禮後，最後只會留一盒半盒給家人賞月食，以前家庭人數多，一個月餅公價切四件，再大棚人的是八件，更大棚的再片薄片……所以每見大人們食蓮蓉，都好似食黃蓮咁，應該係回想供咗一年銀両，就係食得一片關係。

時移勢易，而家送禮都還有，但都冇咁奉旨，加上新聞好快會搬啲專家出嚟，話食月餅會乜會物，令人以為食緊山埃，少食為妙，唔食仲好。

自己食得開心至緊要，一件月餅，一杯普洱，正。