又煲劇

近來深宵重播1984年版《鹿鼎記》，立時啲娛樂新聞便以此做話題……難怪的，成齣劇有幾多個影帝影后做？

年頭已喺佢哋個黃金台睇過一次，今次看，發現是配有字幕，當時睇完都寫了一篇「又談《鹿鼎記》」，談談劇談談小說談談東談談西。

除了晚上又重溫此劇外（冇嘢餸紅酒，聊勝於無），更驚喜的是那黃金台，上星期播完那齣不知所謂的《武俠帝女花》及新版《書劍恩仇錄》後，接播的是《小李飛刀》。

看到是修復版，出來效果比《鹿鼎記》執得仲靚。

看時先預了會悶，畢竟已經是1978年的劇，快近半個世紀了，但看了一陣後，出奇地不覺悶，反而覺得好睇。

看到劇中的主角們，真的好古代武俠形象，不似而家啲吸血殭屍般的，人人濶袍大袖飛來飛去.

小時候看這劇，只記得朱江演的李尋歡好木獨，今番睇，又不是那回事，仲好打得，相比現時嗰啲全替身吸血殭屍，朱江真係好似大叔李探花，演阿飛的黃元申，當時年紀已超越小說設計十幾年，但那份冷漠高傲，我行我素，真係阿飛的確係阿飛。

年輕的黃杏秀演武林第一美人林仙兒，真係無出其右，暫時只是不夠小說中的蛇蠍，但現只播了幾集，她出場也不多，要看埋之後才作總結。

套劇太耐歷史，現在基本上當新劇看，因為全無印象，但唯一一個配角，當年看過，到今天仍記得，就是故事開頭李尋歡的僕人鐵傳甲，是由徐廣林來演，看了幾集後，方明白為何會印象深，因為他演得太好，他本身是舞台劇演員，演此劇時，便用舞台劇方式演譯這只是配角的人物，表情對白都完勝所有演員，令觀眾不知不覺間留下了深刻印象。

數年前才因為重看讀小說，寫了一大篇博文「小李飛刀並不是小李飛刀」，道出個人的見解，其中對女主角林詩音的看法是幾極端，到今日再看劇中情節，更堅定是無睇錯，哈。

首主題曲更是劇集靈魂，顧家煇的曲有憂怨，有激昂，作為襯底音樂完全配合故事劇情變化，歌詞雖然有一半係離題萬丈，但羅文的完美演譯，已無暇留意瑕疵，難怪當年此曲紅遍全世界。

文頭寫那不知所謂的《武俠帝女花》，都有少少東西可說，記得當年播的時候，已好多人在大聲講大聲笑，早前都看過有資深電影界中人，在網上略提此劇，當然都係帶上輕蔑態度，因為任白的《帝女花》是戲曲經典，點會被惡攪到個武俠世界出來？

其實金庸在1956年已攪咗部《武俠帝女花》，是為《碧血劍》，當中的長平公主即是阿九，之後在《鹿鼎記》中都繼續出場，成為阿珂及韋小寶師父，現在正追劇的看倌，耐心等待，好快便出場，那為甚麽這些人不去笑金庸呢？

初頭看《武俠帝女花》，見有姜大衞、劉松仁、米雪及余安安，監製係簫笙，諗住都不錯吧，誰知劇情完全唔知做乜，拖拖拉拉悶到不停搵周公，好快已不看也罷……莫少聰演的大奸角，本來角色設計是好，可惜當時太年輕，駕馭不到角色，及面對幾大當紅主角，自然給比下去，只是到結尾他的造型變成一頭白髮，令人眼前一亮。

因想到一齣胎死腹中的《新龍門客棧》電影，開拍前他們拍下造型照廣發各出版社，那時收到後，見到莫少聰那全白太監造型，大叫：型！

最後睇了少少《武》劇結局，便想那拍不成的電影，是否看了此劇才為莫少聰再度身訂做呢？